ތ. ވިލުފުއްޓަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށްޓަކައި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އެ ރަށުގައި އިމާރާތްކޮށްފައިވާ 100 ހައުސިން ޔުނިޓަށް އެދި ފޯމު ހުށަހެޅުމުގެ ފުރުސަތު ކޮންސްޓްރަކްޝަން މިނިސްޓްރީން ހުޅުވާލައިފި އެވެ.

ކޮންސްޓްރަކްޝަން މިނިސްޓްރީން ކޮށްފައިވާ އިއުލާނެއްގައި ބުނީ، ވިލުފުށީގައި އިމާރަތްކޮށްފައިވާ ހައުސިން ޔުނިޓްތަކަށް އެދ ފޯމު ހުށަހެޅުމުގެ ފުރުސަތު މި މަހުގެ 11 ވަނަ ދުވަހު ހުޅުވާލުމަށް ހަމަޖެހިފައިވާ ކަމަށެވެ. އެ މިނިސްޓްރީން ބުނީ ހައުސިން ޔުނިޓްތަކަށް ޝަރުތު ހަމަވާ ފަރާތްތަކުން hiyaavehi.housing.gov.mv ޕޯޓަލް މެދުވެރިކޮށް ފޯމު ހުށަހެޅޭނެ ކަމަށެވެ.

މި ހައުސިން ޔުނިޓްތަކަށް އެދޭ ފަރާތްތަކަކީ އުމުރުން 18 އަހަރު ފުރިފައިވާ ދިވެހިންނަށް ވާންޖެހެ އެވެ. މީގެ އިތުރުން ވިލުފުށީގެ ރަށްވެހިންނަށާއި، ނުވަތަ އެ ރަށަށް ހިޖުރަކޮށް މެދުނުކެނޑި 10 އަހަރު ދުވަހު ދިރިއުޅެމުންދާ ފަރާތްތަކަށް ހައުސިން ޔުނިޓުތައް ދިނުމުގައި ހާއްސަ އިސްކަމެއް ދިނުމަށް ނިންމާފައިވާއިރު ހައުސިން ޔުނިޓްތައް ހޯދަން އެދޭ ފަރާތް ނުވަތަ އަނބިމީހާ / ފިރިމީހާގެ ނަމުގައި ރާއްޖޭގެ އެއްވެސް ސަރަހައްދަކުން 600 އަކަފޫޓަށްވުރެ ބޮޑު ބިމެއް ނުވަތަ ސަރުކާރުގެ ބޯހިޔާވަހިކަމުގެ މަޝްރޫއަކުން ޔުނިޓެއް ލިބިފައި އޮވެގެން ނުވާނެ ކަމަށް އެ އުސޫލުގައި ވަނީ ބަޔާންކޮށްފަ އެވެ.

އަދިހަމަ އެހެންމެ، ފާއިތުވި ތިން އަހަރު ދުވަހުގެ ތެރޭގައި އެފަދަ ބިމެއް ވިއްކާލާފައިވާ ނުވަތަ އެހެން ފަރާތަކަށް ދީފައިވާ ފަރާތަކަށްވެސް ވެގެން ނުވާނެ ކަމަށާއި، 600 އަކަފޫޓަށްވުރެ ކުޑަ ބިމެއް އޮތް ނަމަ، ހައުސިން ޔުނިޓް ލިބުމުން އެ ބިން ދޫކޮށްލަން އެއްބަސްވާން ޖެހޭނެ ކަމަށްވެސް އެ އުސޫލުގައި ބަޔާންކޮށްފައިވެ އެވެ. މީގެ އިތުރުން ހައުސިން ޔުނިޓް ހޯދަން އެދޭ ފަރާތްތަކުގެ މަސްދުވަހަކަށް ޖެހޭ ޖުމްލަ އާމްދަނީ 60,000 ރުފިޔާއަށްވުރެ އިތުރުވެގެން ނުވާނެ ކަމަށް އެ އުސޫލުގައި ވަނީ ބަޔާންކޮށްފަ އެވެ.

ކޮންސްޓްރަކްޝަން މިނިސްޓްރީން ބުނީ ފޯމު ހުށަހަޅާ ފަރާތްތަކަށް، މި އަހަރުގެ އޭޕްރީލް މަހުގެ 11 ވަނަ ދުވަހުގެ ނިޔަލަށް ހައުސިން ޔުނިޓްތަކަށް އެދި ފޯމު ހުށަހެޅޭނެ ކަމަށެވެ. މިކަމާ ގުޅޭ އިތުރު މައުލޫމާތު ސާފުކުރަން ބޭނުންވާ ފަރާތްތަކުން ހިޔާވެހި ޕޯޓަލް މެދުވެރިކޮށް ސުވާލު ހުށަހަޅައިގެން ނުވަތަ އެ މިނިސްޓްރީގެ ނަމްބަރު 4004919 އަށް ގުޅައިގެން މައުލޫމާތު ސާފުކުރެވޭނެ ކަމަށެވެ.