މީޑިއާ ގްރާންޓަށް ޝަރުތުހަމަވި 41 މީޑިއާގެ ތެރެއިން އެހީއަށް އެދުމުގެ އެންމެ ފަހު މަރުހަލާ ފުރިހަމަކުރި 39 މީޑިއާ އަށް 28.2 މިލިއަން ރުފިޔާ ދޫކުރަން ކަނޑައަޅައި މިއަދު އިއުލާނުކޮށްފި އެވެ.
މީޑިއާ ކޮމިޝަނުން ނެރެފައިވާ ނޫސްބަޔާނެއްގައި ހާމަކޮށްފައިވާ ގޮތުގައި، މީޑިއާތަކަށް ދޫކުރާ އެހީއަށް އެދުމުގެ ފުރުސަތު ހުޅުވައިލުމުން 57 މީޑިއާއަކުން ވަނީ ޕޯޓަލްގައި ޕްރޮފައިލް ކްރިއޭޓު ކޮށްފައި ކަމަށެވެ. އެހެން ނަމަވެސް އޭގެ ތެރެއިން ޝަރުތު ހަމަވީ 41 މީޑިއާއެއް ކަމަށް މީޑިއާ ކޮމިޝަނުން ވަނީ ބުނެފަ އެވެ.
ނަމަވެސް، މީޑިއާ ކޮމިޝަނުން މިއަދު ނެރުނު ނޫސްބަޔާނެއްގައި ބުނީ އެހީއަށް އެދުމުގެ އެންމެ ފަހު މަރުހަލާ ފުރިހަމަކުރީ 39 މީޑިއާއެއް ކަމަށާއި އެ މީޑިއާތަކަށް މާލީ އެހީގެ ގޮތުގައި ދޭ އަދަދު މީޑިއާ އެޕްގެ ޕޯޓަލް އިން އާންމުކޮށް ފެންނަން ހުންނާނެ ކަމަށެވެ.
މީޑިއާ ކޮމިޝަނުން ބުނީ މާލީ އެހީއަށް އެދުމަށް ފުރިހަމަކުރަން ޖެހޭ އިޖުރާއަތުތައް ދެ މީޑިއާއަކުން ފުރިހަމަކޮށްފައި ނުވާތީ، ފިނޭންސް މިނިސްޓްރީއާ ގުޅިގެން އެ ފައިސާ އެ ފަރާތްތަކަށް ލިބޭނެ އިންތިޒާމު ހަމަޖައްސައިދިނުމުގެ މަސައްކަތް ކުރިއަށް ގެންދިއުމަށް ޔޫތު މިނިސްޓްރީގައި އެދިފައި ވާނެ ކަމަށެވެ.
މީޑިއާތަކަށް މާލީ އެހީ ދޫކުރާނީ ޔޫތު މިނިސްޓްރީ އާއި އެ ކޮމިޝަނާ ދެމެދުވެފައިވާ އެއްބަސްވުމުގައިވާ ގޮތަށް އެޕްލިކޭޝަން ހުށަހެޅި މީޑިއާތަކުގެ މައުލޫމާތު ޔޫތު މިނިސްޓްރީއާ ހިއްސާކުރުމުން، އެ މިނިސްޓްރީން ފިނޭންސް މިނިސްޓްރީ އަށް ފޮނުވައިގެންނެވެ. އަދި ޝަރުތު ހަމަވާ ކޮންމެ މީޑިއާއަކަށް ޖުމްލަ ލިބޭ އަދަދު، އެއް ޕޭމަންޓެއްގެ ގޮތުގައި ލިބޭނެ އެވެ.
މި އަހަރަށް ކަނޑައެޅި ދައުލަތުގެ ބަޖެޓުން 27.9 މިލިއަން ރުފިޔާ މީޑިއާތަކަށް ދިނުމަށް ވަނީ ކަނޑައަޅައިފަ އެވެ. އެއީ ބަޖެޓުގެ އަންދާޒާ ކުރެވޭ އާމްދަނީގެ 0.1 އިންސައްތަ ކަމަށް މީޑިއާ ކޮމިޝަނުން ވަނީ ބުނެފަ އެވެ.
