ކުރިއަށް ގެންގޮސްފައިވާ އެއްވެސް ދިރާސާއެއްގައި ރާއްޖޭގައި އެހެން ދީންތައް އޮންނަން ފެނޭތޯ ސުވާލެއް ހިމަނާފައި ނުވާނެ ކަަމަށް ހިއުމަން ރައިޓްސް ކޮމިޝަން އޮފަ ދަ މޯލްޑިވްސް (އެޗްއާރުސީއެމް) އިން ބުނެފި އެވެ.
އެޗްއާރުސީއެމް އިން މިކަން ހާމަކޮށްފައިވަނީ އެ ކޮމިޝަނުން ކުރި ދިރާސާއަކާ ގުޅޭގޮތުން މީޑިއާގައި ދައުރުވަމުންދާ ވާހަކަތަކާ ގުޅިގެން ނެރުނު ނޫސް ބަޔާނެއްގަ އެވެ. އެޗްއާރުސީއެމް އިން ބުނީ އެ ކޮމިޝަނުގެ މަސައްކަތްތައް ބިނާކުރެވި ހިނގަމުންދާނީ އިސްލާމީ ޝަރީއަތާއި ގާނޫނުއަސާސީ އާއ،ި ގާނޫނުތަކާއ،ި ރާއްޖެއިން ސޮއިކޮށް އަމަލުކުރުމަށް ދައުލަތުން އެއްބަސްވެ ގަރާރުވެފައިވާ މުއާހަދާތަކާ އެއްގޮތްވާ ގޮތުގެ މަތިން ކަމަށެވެ.
އެޗްއާރުސީއެމް އިން ބުނީ އެފަދަ ހާލަތަކާއި ހިލާފުވާ އެއްވެސް ކަމެއް ހުއްދަ ކުރުމަށް ނުވަތަ އެފަދަ ކަމަކަށް ހިތްވަރު ލިބޭނެ އެއްވެސް ވާހަކައެއް އެ ކޮމިޝަނުން ބަޔާންކޮށްފައި ނުވާނެ ކަމަށެވެ.
އިސްލާމީ ޝަރީއަތާއި ގާނޫނުއަސާސީ އާއ،ި ގާނޫނުތަކާއ،ި ރާއްޖެއިން ސޮއިކޮށް އަމަލުކުރުމަށް ދައުލަތުން އެއްބަސްވެ ގަރާރުވެފައިވާ މުއާހަދާތަކުގެ އިމުގެ ތެރޭގައި އެޗްއާރުސީއެމްގެ މަސައްކަތްތައް އަބަދުވެސް ހިންގަމުން ގެންދާނެކަމުގެ ޔަގީންކަން އަރުވާ ކަމަށް އެ ކޮމިޝަނުން ނެރުނު ނޫސްބަޔާނުގައި ވަނީ ބުނެފަ އެވެ.
މީގެ އިތުރުން އެޗްއާރުސީއެމް އިން ބުނީ، ހުރިހާ ވަގުތަކު ހުރިހާ ކަމެއްގައިވެސް އިސް ކުރާނީ އިސްލާމީ ޝަރީއާތާއި އިސްލާމްދީނުގެ ހަމަތަކާއި ދިވެހި ރައްޔިތުންނާއި ދިވެހި ދައުލަތުގެ މަސްލަހަތުތައް ކަމަށެވެ. އަދި އެ ކޮމިޝަނުގެ މަސައްކަތްތަކާ ގުޅޭގޮތުން ހަޤީގަތާއި ހިލާފު ވާހަކަތަކާއި މާނަ އޮޅޭގޮތަށް ދޮގު ވާހަކަތައް ނުދެއްކުމަށް ވެސް އެޗްއާރުސީއެމުން ވަނީ އިލްތިމާސްކޮށްފަ އެވެ.
