މުސްލިމުން ތަފާތު އިލްމުތަކުގައި ކުރިއަރައި މެދުއުޑުގައި ފިޔަޖަހަމުން ދިޔައީ އެބައިމީހުންގެ އީމާންތެރިކަމުގެ ސަބަބުން ކަމަށް މިއަދުގެ ހުކުރު ހުތުބާގައި ބުނެފި އެވެ.
މިއަދުގެ ހުކުރު ހުތުބާގައި ބުނި ގޮތުގައި، އިސްލާމީ އުންމަތް މިއަދު ވެއްޓިފައިވާ ފުން ވަޅުގަނޑަށް ވެއްޓުނީ، މުސްލިމުން ދީނާ ދުރުވެ، ދީނާއި ސިޔާސަތު ވަކިކޮށް، އިލްމާއި ދިރާސާކުރުން ދޫކޮށްލައި، ހަމައެކަނި މާއްދީ ދުނިޔެއަށް ހެއްލުމުގެ ސަބަބުން ކަމަށެވެ. މިހާލަތުން އަރައިގަތުމަށް މުސްލިމުންނަށް ވާޖިބުވެގެންވާ ކަމަށް މިހާލަތުން އަރައިގަނެވޭނީ ކީރިތި ގުރުއާނާއި، ކީރިތި ރަސޫލާގެ ސުންނަތަށް އެނބުރި ރުޖޫއަވެ، އިލްމު ހޯދުމުގައި ގަދައަޅައި މަސައްކަތް ކުރުމުން ކަމަށް ހުތުބާގައި ވަނީ ބުނެފަ އެވެ.
އިސްލާމީ ހަލާރަތް ފެށުނީ ކީރިތި ރަސޫލާއަށް ވަހީ ބާވައިލައްވަން ފެށުނު ހިސާބުންކަން ފާހަގަކުރަމުން ހުތުބާއި ބުނީ، އިސްލާމްދީނުގެ އަސާސްތަކުގެ މަތީގައި ކީރިތި ރަސޫލާ އަޅުއްވައިދެއްވި ބިންގަލުގެ ސަބަބުން އިސްލާމީ ހަލާރަތް ހަލުވި ދުވެއްޔެއްގައި ކުރިއަރައި ދިޔަ ކަމަށެވެ.
އިސްލާމީ ހަލާރަތުގެ މައިގަނޑު އަސާސްތަކުގެ ތެރޭގައި އިސްލާމީ އަގީދާއާއި، ޝަރުއީ ހުކުމްތަކާއި، ރިވެތި އަހްލާގް ހިމެނޭކަން ފާހަގަކުރަމުން ހުތުބާގައި ބުނީ، ބިން އާރާސްތުކުރުމުގައި އިލްމު އުނގެނުމަކީ ދީނާއި ގުޅިފައިވާ ވާޖިބު ކަމެއްގެ ގޮތުގައި މުސްލިމުން ގަބޫލުކުރި ކަމަށެވެ. ނަތީޖާއެއްގެ ގޮތުން އުމްރާނީ ގޮތުންނާއި، އިލްމީ ގޮތުން ދުނިޔޭގައި އޭރު އެއްވެސް ބަޔަކަށް ހޯދިފައިނުވާ އެތަށް ކުރިއެރުންތަކެއް މަދު އަހަރުތަކެއްގެ ތެރޭގައި މުސްލިމުންނަށް ހޯދުނު ކަމަށް ހުތުބާގައި ބުންޏެވެ.
އެގޮތުން އަންދަލުސްގައި މުސްލިމުން ވެރިކަންކުރަން ފެށިއިރު، އެ ސަރަހައްދު އޮތީ ޔޫރަޕުގެ އެހެން ސަރަހައްދުތަކެކޭ އެއްފަދައިން އިޖުތިމާއީ ގޮތުންނާއި، އިގްތިސާދީ ގޮތުންނާއި، އިލްމީ ގޮތުން ވަރަށްވެސް ދަށް ފެންވަރެއްގައި ކަން ހުތުބާގައި ވަނީ ބުނެފަ އެވެ. އެހެންނަމަވެސް އެ ތަނުގައި މުސްލިމުން ގާއިމުވެ، ހިޖުރައިން ތިންވަނަ ގަރުނުގެ ފަހުކޮޅު، މުޅި ދުނިޔޭގައި އެންމެ ކުރިއަރާފައިވާ ސިޓީ ކަމުގައި އަންދަލުސްގެ ގުރްތުބާ ވެގެން ދިޔަކަން ހުތުބާގައި ފާހަގަކުރި އެވެ.
މުސްލިމުން ވެއްޓިފައިވާ ފުން ވަޅުގަނޑުން ސަލާމަތްވެވޭނީ މުސްލިމުން އެކަތިގަނޑަކަށްވެ، އިސްލާމްދީނުގެ އަސާސްތަކުގައި ހިފަހައްޓައި، އިލްމު ހޯދުމުގައި ގަދައަޅައި މަސައްކަތް ކުރާ ބަޔަކަށް ވެގެން ކަމުގައި ހުތުބާގައި ވަނީ އިތުރަށް ބުނެފަ އެވެ.
