ސޯޝަލް ހައުސިން ޔުނިޓުތައް ބިދޭސީންނަށް ކުއްޔަށް ދީފައިވޭތޯ ބަލައި، ފިޔަވަޅުއެޅުމަށް ނިންމާފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފި އެވެ.
އެޗްޑީސީން ކުރި އިއުލާނެއްގައި ބުނީ ހުޅުމާލޭގައި ތަރައްގީކޮށް ޝަރުތުހަމަވާ ފަރާތްތަކަށް ސަރުކާރުން ދޫކޮށްފައިވާ ސޯޝަލް ހައުސިން ޔުނިޓްތައް، ބައެއް ފަރާތްތަކުން ގަވާއިދާ ހިލާފަށް ބިދޭސީންނަށް ކުއްޔަށް ދެމުންދާކަން އެ ކޯޕަރޭޝަނަށް ފާހަގަކުރެވިފައިވާ ކަމަށެވެ.
އެޗްޑީސީން ވަނީ މިފަދައިން ސޯޝަލް ހައުސިންގެ ދަށުން ދޫކޮށްފައިވާ އެއްވެސް ޔުނިޓެއް، އެއްވެސް ފަރާތަކުން ބިދޭސީންނަށް ކުއްޔަށް ދޫކޮށްފައިވާނަމަ އަންނަ ޖެނުއަރީ މަހުގެ ތިން ވަނަ ދުވަހުގެ ކުރިން އެތަންތަން ހުސްކުރުމަށް އެ ފަރާތްތަކަށް އެންގުމަށާއި، އެޗްޑީސީއާއެކު ވެފައިވާ އެއްބަސްވުމާ އެއްގޮތަށް ފްލެޓް ލިބިފައިވާ ފަރާތްތަކުން އަމަލުކުރުމަށް އަންގާ ކަމަށެވެ.
އެޗްޑީސީން ބުނީ އަންނަ ޖެނުއަރީ ތިން ވަނަ ދުވަހުގެ ފަހުން ހުޅުމާލެއިން ދޫކޮށްފައިވާ އެއްވެސް ސޯޝަލް ހައުސިން ޔުނިޓެއް ބިދޭސީންނަށް ކުއްޔަށް ދީފައިވާނަމަ އެ ކޯޕަރޭޝަނާއެކު ވެފައިވާ ފްލެޓް އެއްބަސްވުން އުވާލާނެ ކަމަށް އަންގާ އިއުލާނުކުރާ ކަމަށެވެ.
ސޯޝަލް ހައުސިން ޔުނިޓުތައް ބޮޑު އަގުގައި ކުއްޔަށްދޭ ކަމުގެ ޝަކުވާއަކީ އާންމުންގެ މެދުގައި ބޮޑު ޝަކުވާއެކެވެ. ސޯޝަލް ހައުސިން ޔުނިޓުތައް ކުއްޔަށް ދޫކުރުމަކީ މަނާ ކަމެއް ނަމަވެސް ފްލެޓް ލިބިފައިވާ ގިނަ ފަރާތްތަކުން އަންނަނީ ފްލެޓްތައް ބޮޑު އަގުގައި ކުއްޔަށް ދޫކުރަމުންނެވެ. އަދި މިފަދަ ފަރާތްތަކާމެދު އެއްވެސް ސަރުކާރަކުން މިހާތަނަށް ފިޔަވަޅެއް އަޅައިފައެއް ނުވެ އެވެ.
