އިސްރާއީލުން ޣައްޒާގެ ނަސްލު ނައްތާލުމުގެ މަސައްކަތް ކުރި ކަމަށް ބުނެ އެ ސްޓޭޓާއި ދެކޮޅަށް ދެކުނު އެފްރިކާއިން ބައިނަލްއަގްވާމީ ޖިނާޢީ ކޯޓަށް ހުށަހަޅާފައިވާ މައްސަލައިގައި ދެކުނުއެފްރިކާއަށް ތާއީދުކުރުމަށް ބެލްޖިއަމް އިން ނިންމައިފިއެވެ. މީގެ ކުރިން ބްރެޒިލް، އަޔަލޭންޑް، ބޮލީވިއާ، ކޮލަމްބިއާ، ލީބިޔާ، ސްޕެއިން އަދި މެކްސިކޯ ފަދަ ބައެއް ގައުމުތަކުން ވަނީ މި މައްސަލަ އާއި ގުޅިފައެވެ.
ޣައްޒާ “ހަފުސް ކޮށްލާނެ” ކަމަށް ބުނެ ޒައެނިސްޓުން ޙަމަލާ ދޭން ފެށުމާއި އެކު، ގާތްގަނޑަކަށް ހަތަރުމަސް ވީ ތަނާހެން 2024 ވަނަ އަހަރުގެ ޖެނުއަރީ މަހު ބައިނަލްއަޤްވާމީ ކޯޓުން ވަނީ ނަސްލު ނައްތާލުމުގެ ޖަރީމާތައް ނުހިންގުމަށް އިސްރާއީލަށް ގޮވާލާފައެވެ. ނަމަވެސް އިސްރާއީލުން ދިނީ ބީރު ކަންފަތެކެވެ.
އަދި ޣައްޒާއަށް އިންސާނީ އެހީތެރިކަން ފޯރުކޮށްދިނުމަށް ހުއްދަ ދިނުމާއި، ހަނގުރާމައިގެ ޖަރީމާތައް ހުއްޓުވުމާއި، އެފަދަ އަމަލުތައް ކުރާ މީހުންނަށް އަދަބު ދިނުމަށް އިސްރާއީލަށް އަމުރުކޮށް އައިސީޖޭއިން ވަނީ ވަގުތީ ފިޔަވަޅުތަކެއް ވެސް ނެރެފައެވެ. މި ހުރިހާ ކަމަކަށް ވެސް ޒައެނިސްޓް ސަރުކާރު ވަނީ ބޮލާލާޖަހާފައެވެ.
ޣައްޒާ ހަނގުރާމަ ހުއްޓައިލުމަށް މިއަހަރުގެ އޮކްޓޯބަރު މަހުގެ 10 ވަނަ ދުވަހު ފެށި އެއްބަސްވުމުގެ ފުރަތަމަ މަރުހަލާ ނިންމުމަށް ކުރަމުންދާ މަސައްކަތްތައް ހަމާސް އިން ކުރިއަށް ގެންދާ އިރު، އިސްރާއީލުން ވަނީ އެތައް ފަހަރަކު އެ އެއްބަސްވުމާއި ވެސް ހިލާފުވެފައެވެ. އެގޮތުން އެ އެއްބަސްވުމަށް އަމަލުކުރަން ފެށިފަހުން ޒައެނިސްޓުން ވަނީ ޣައްޒާގައި 406 މީހުން ޝަހީދުކޮށް 1،118 މީހުން ޒަޚަމްކޮށްލާފައެވެ.
7 އޮކްޓޯބަރު 2023 ގައި ޒައެނިސްޓުން ފެށި ޖަރީމާ ތަކުގައި ވެސް މަދުވެގެން 70,942 މީހުން ޝަހީދުކޮށްލާފައި ވާއިރު، އިތުރު 171,195 މީހުން ވަނީ ޒަހަމް ކޮށްލާފައެވެ.
