މި އަހަރުގެ މިހާތަނަށް 498 ކިލޯއަށްވުރެ ގިނަ މަސްތުވާތަކެއްޗާއި 6860 ބަނގުރާ ފުޅި ނުވަތަ ދަޅު އަތުލައިގަނެވިފައިވާ ކަމަށް ފުލުހުން ހާމަކޮށްފި އެވެ.

ފުލުހުން މިކަން ހާމަކުރީ މިއަދު ބޭއްވި ނޫސްވެރިންގެ ބައްދަލުވުމުގަ އެވެ. މިކަމާ ގުޅޭގޮތުން މައުލޫމާތު ދެއްވަމުން ޑްރަގް އެންފޯސްމަންޓުގެ ކައުންޓާ ނާކޮޓިކްސް އޮޕަރޭޝަންސްއާ ހަވާލުވެ ހުންނެވި ޗީފް އިންސްޕެކްޓާ އޮފް ޕޮލިސް ފާތިހު މުހައްމަދު ވިދާޅުވީ ޖެނުއަރީ އެއްވަނަ ދުވަހުން ފެށިގެން ޑިސެމްބަރު 20 ވަނަ ދުވަހުގެ ނިޔަލަށް 498.99 ކިލޯއަށްވުރެ ގިނަ މަސްތުވާތަކެތި އަތުލައިގެންފައިވާ ކަމަށާއި އެ ތަކެތީގެ މަގުމަތީ އަގު 871.243،131.00 މިލިޔަނަށް އަރާ ކަމަށެވެ.

ފާތިހު ވިދާޅުވެފައިވާ ގޮތުގައި، މި އަހަރުގެ މިހާތަނަށް 6860 ބަނގުރާ ފުޅި / ދަޅު އަތުލައިގަނެވިފައިވާ ކަމަށާއި އެ ތަކެތީގެ މަގުމަތީ އަގު 3،992،492.50 އަށް އަރާ ކަމަށެވެ. އެއާއެކު މި ތަކެތީގެ ޖުމުލަ އަގު 875،235،623.50 އަށް އަރަ އެވެ.

ފާތިހު ވިދާޅުވި ގޮތުގައި، މަސްތުވާތަކެތީގެ މައްސަލަތަކުގައި ހިމެނޭ ޓްރެފިކިން މިންގަނޑަށް ފެތޭ މީހުންނާއި މަސްތުވާތަކެތީގެ ވަބާގައި ޖެހިފައި ތިބި މީހުން ހިމެނޭހެން ޑްރަގް އެންފޯސްމަންޓުން ހިންގި އޮޕަރޭޝަންތަކުގައި މި އަހަރުގެ މިހާތަނަށް މަސްތުވާތަކެތީގެ 188 އޮޕަރޭޝަނެއް ހިންގައި 16.024 މީހުން ބަލައިފާސްކޮށް، 997 މީހަކު ހައްޔަރުކޮށްފައިވާ ކަމަށެވެ. ހައްޔަރުކުރި މީހުންގެ ތެރެއިން 137 ބިދޭސީއަކު ހިމެނޭއިރު އެ މީހުން މިހާރު ޑީޕޯޓްކޮށްފައިވާ ކަމަށާއި މަސްތުވާތަކެތީގެ ވަބާގައި ޖެހިފައިވާ ފަރާތްތަކުގެ ތެރެއިން ޑްރަގް ކޯޓު މެދުވެރިކޮށް ފަރުވާގެ ފުރުސަތު 301 މީހަކަށް ހޯދައިދީ އެންޑީއޭގެ ރިމާންޑަށް އެ މީހުން ފޮނުވާލެވިފައިވާ ކަމަށްވެސް ފާތިހު ވިދާޅުވި އެވެ.

ފާތިހު އިތުރަށް ވިދާޅުވީ މަސްތުވާތަކެތީގެ ކެފޭތަކުގެ ގޮތުގައި 11 ތަނެއް ފާހަގަކުރެވިފައިވާ ކަމަށާއި އެތަންތަން މިހާރު ބަންދުކުރެވިފައިވާ ކަމަށެވެ.