1979 ވަނަ އަހަރުގެ މިޞްރު-އިސްރާއީލް ޞުލްޙައިގެ އެއްބަސްވުން އަލުން މުރާޖަޢާ ކުރުމަށް މިޞްރުގެ ސަރުކާރުން ވިސްނަމުންދާތީވެ އިސްރާއީލުގެ ބޮޑުވަޒީރު ނަތަންޔާހޫ ވަރަށް ބޮޑަށް ކަންބޮޑުވެއްޖެއެވެ.

އިސްރާއީލަށް މިޞްރުގެ ސަރަޙައްދުން ފުރިހަމަ އަމާންކަމާއި ރައްކާތެރިކަން އޮތުމާއި އެކު މިޞްރުގެ ސަރުކާރަކީ އިސްރާއީލާއި ގާތް އެކުވެރިއެއްގެ ގޮތުގައި އޮތުމަށާއި، އަދި ސަރަޙައްދުގައި ހިމެނޭ އިސްރާއީލުގެ ދުޝްމަނުންގެ ފަރާތުން ކުރިމަތިވާ އުނދަގޫތަކާއި ދުއްތުރާލާއި ޙަމަލާތަކުން އިސްރާއީލު ދިފާޢު ކުރުމަށް އިސްރާއީލަށް އެއްބާރުލުން ދިނުމަށް އެއްބަސްވުމުގައި ސޮއިކުރީ އެމެރިކާ އިސްނަގައިގެންނެވެ.

މި އެއްބަސްވުން މުރާޖަޢާ ކުރުމަށް ގާހިރާއިން ވިސްނަމުން ދަނީ ސަރަޙައްދީ ޙާލަތު ހަލުވިކަމާއެކު ބަދަލުވަމުންދާތީ ކަމަށް ރިޕޯޓުތައް ބުނެއެވެ.

އިސްރާއީލާއި މިޞްރުން ހަދާފައިވާ އެއްބަސްވުން ބުނާ ގޮތުގައި މިޞްރުގެ އަސްކަރިއްޔާ އަށް ޒަމާނީ ހަތިޔާރު ހޯދާނަމަ ވެސް އިސްރާއީލުގެ ރުހުން ހޯދަން ޖެހެއެވެ.

ރިޕޯޓުތައް ބުނާ ގޮތުގައި މިޞްރުން މިހާރު އަސްކަރިއްޔާ ތަރައްޤި ކުރުމަށް ނިންމާފައި ވަނީ އެ ޤައުމުގެ ވައިގެ ސަރަޙައްދު ޙިމާޔަތްކުރުމަށެވެ.

އިސްރާއީލުގެ މީޑިއާ ރިޕޯޓްތައް ބުނާ ގޮތުގައި މިޞްރުން މިހާރު ވަނީ އިސްރާއީލަށް އެންގުމަކާއި ނުލައި ޗައިނާގައި އުފައްދާފައިވާ އެޗްކިއު9ބީ ދިފާޢީ ނިޒާމުތައް ވެސް ގެނެސް ޓެސްޓު ކޮށްފައެވެ. މިފަދަ ނިޒާމުތަކަކީ މިޞްރުގެ ދިފާޢީ ބާރަށް ލިބޭ ކުރިއެރުމެކެވެ. މިވަރުން ދާނަމަ ކޮންމެވެސް ޒަމާނަކުން އިސްރާއީލުން މިޞްރަށް ކުރާ އިތުބާރު ގެއްލޭނެއެވެ.

އެހެންނަމަވެސް، އޮބްޒާވަރުންގެ ރިޕޯޓުތައް ބުނާ ގޮތުގައި އިސްރާއީލު ސަރުކާރަށް ކުރިން އެންގުމަކާއި ނުލައި މިޞްރުން ޗައިނާގެ ދިފާޢީ ޓެކްނޮލޮޖީ ބޭނުންކުރުން އެއީ ފަހަރެއްގައިވެސް ނަތަންޔާހޫ ކަންބޮޑުވާން ޖެހޭނެ ވަރުގެ ކަމެއް ނޫނެވެ. ސަބަބަކީ އިސްރާއީލުން މިހާތަނަށް ހެދި އެންމެ ވަރުގަދަ ގޭސް ޑީލް އިހަށްދުވަހު އެ ސޮއި ކޮށްލީ ވެސް މިޞްރާއި އެކުގައި ކަމަށްވާތީ ޤާހިރާއިން ނަތަންޔާހޫ އަކަށް ލަނޑެއް ނުދޭނެއެވެ.

މި ޝައްކުތައް އުފެދުނަސް، ޞުލްޙައިގެ އެއްބަސްވުން ބާޠިލް ކުރަން ނުވަތަ އިސްރާއީލާއި ގުޅުން ކަނޑާލަން މިޞްރުން އެއްވެސް މިންވަރަކަށް މަސައްކަތް ކުރާ ކަމުގެ ރަސްމީ ޢަލާމާތެއް ނުފެނެއެވެ. ފެންނަނީ ހައްތާވެސް އިސްރާއީލާއި މިޞްރުން ގާތްވާން އުޅޭ ތަނެވެ.