އިސްރާއީލަށް ޙަމަލާ ދިނުމަށް ހޫޘީންގެ 10000 މީހުން ހިމެނޭ ލަޝްކަރެއް ތައްޔާރުވަމުންދާ ކަމަށް ޔަހޫދީ އަސްކަރިއްޔާއިން ބުނެފިއެވެ.
އިސްރާއީލު ސިފައިން ބުނާ ގޮތުގައި، މި ލަޝްކަރު ތައްޔާރުވަމުން ދަނީ އެކި ދިމަދިމާލުން އިސްރާއީލަށް ޙަމަލާ ދިނުމަށެވެ. އޭގެތެރޭގައި ޔަމަނާއި ޣިރާޤާއި ލުބުނާނާއި އުރުދުން އަދި ސީރިއާ ހިމެނޭ ގޮތަށް މި ލަޝްކަރުގެ މީހުން ވަނީ މެދުއިރުމަތީގައި ފެތުރިފައި ކަމަށް ވެސް ޔަހޫދީ އަސްކަރިއްޔާ އިން ބުނެއެވެ.
ޔަހޫދީ އަސްކަރިއްޔާ އިން ބުނާ ގޮތުގައި އީރާނުން ދަނީ ޔަމަނުގައި ތިބި ހޫޘީ ވެރިންނާއި ޤަވާޢިދުން މަޝްވަރާކޮށް، ހޫޘީންނަށް ބޭނުންވާ ހަތިޔާރާއި ތެޔޮ ފޯރުކޮށްދީ އަސްކަރީ ތަމްރީނާއި އިރުޝާދު ވެސް ފޯރުކޮށްދެމުންނެވެ.
Advertisement
އިސްރާއީލު ސިފައިން ބުނާ ގޮތުގައި އެމީހުންގެ މިހާރުގެ އެންމެ ބޮޑު ކަންބޮޑުވުމަކީ މުޅި ސަރަޙައްދުގައި ތިބި ހޫޘީން ބޭނުންކޮށްގެން އިސްރާއީލަށް ޙަމަލާތަކެއް ދީފާނެތީއެވެ.
ރިޕޯޓްތައް ބުނާ ގޮތުގައި އިސްރާއީލުން އެންމެ ބޮޑަށް ޝައްކު ކުރަނީ އީރާނުގެ އޯޑަރަށް ބެލިސްޓިކް މިސައިލާއި ޑްރޯން ބޭނުންކޮށްގެން ނުވަތަ ބިމުން ވެސް ޓެލްއަވީވަށް ޙަމަލާތަކެއް ދީފާނެތީއެވެ. އެހެންކަމުން އައިޑީއެފުން އެމެރިކާ އާއި ގުޅިގެން މެދުއިރުމަތި ވަރަށް ގާތުން މޮނިޓަރ ކުރަމުންދާ ކަމަށް ރިޕޯޓުތައް ބުނެއެވެ. މިދިޔަ ހުކުރު ދުވަހު ވެސް އެމެރިކާއިން ވަނީ ސީރިއާގައި ތިބި ހޫޘީންނާއި އަދި އައިއެސްއައިއެސް އާއި ގުޅުން ހުރި ތަންތަނަށް ރޮކެޓް ޙަމަލާތަކެއް ދީފައިކަން ފާހަގަ ކުރެވެއެވެ.
އިސްރާއީލު ސިފައިންގެ އަންދާޒާތަކަށް ބަލާއިރު، ޣައްޒާގެ ސަރަޙައްދުގައި ހަނގުރާމަތައް އަލުން ފެށިއްޖެ ނަމަ ހޫޘީން އިސްރާއީލަށް ޙަމަލާ ދީފާނެ އެވެ.
މެދުއިރުމަތީގައި މުސްލިމުންނަށް އޮތް އެންމެ ބޮޑު ނުރައްކަލަކީ އިސްރާއީލު ކަމަށްވާއިރު، ދުނިޔޭގެ އެކި ކަންކޮޅުތަކުގައި ޓެރަރިސްޓް ޙަމަލާތައް ދިނުމުގެ އަޑީގައި ތިބީ ވެސް ޔަހޫދީން ކަމަށް އީރާނުން ބުނެއެވެ.
