މިއަހަރު ޖުލައި 26 ވަނަ ދުވަހު ހުޅުވި ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް (ޓަމިނަލް 1) އިން މިހާތަނަށް 500،000 އަށްވުރެ ގިނަ ފަސިންޖަރުންނަށް ހިދުމަތް ދީފި އެވެ.
ރާއްޖޭގެ މައި ވައިގެ ބަނދަރު ހިންގަމުން އަންނަ އެމްއޭސީއެލް އިން މިއަދު ނެރުނު ނޫސްބަޔާނެއްގައި ބުނެފައިވަނީ މި މަހުގެ 15 ވަނަ ދުވަހުގެ ނިޔަލަށް 508،008 ފަސިންޖަރުންނަށް ޓާމިނަލް 1 އިން ހިދުމަތް ދީފައިވާ ކަމަށެވެ. އެއީ ރާއްޖެއިން ފުރި 252،340 ފަސިންޖަރުންނާއި، ރާއްޖެއަށް އައި 255،668 ފަސިންޖަރުންނެވެ.
އެމްއޭސީއެލް އިން ބުނީ 21 ޑިސެންބަރު، އިއްޔެ ޓާމިނަލް 1 އިން 19،551 ފަސިންޖަރުންނަށް ދީފައިވާ ކަމަށާއި، އެއީ މިހާތަނަށް އެ ޓާމިނަލުން އެންމެ ގިނަ ފަސިންޖަރުންނަށް ހިދުމަތް ދިން ދުވަސް ކަމަށެވެ. އޭގެ ތެރޭގައި ހިމެނެނީ ރާއްޖެއިން ފުރި 8،681 ފަސިންޖަރުންނާއި، ރާއްޖެ އައި 10،870 ފަސިންޖަރުންނެވެ.
ރާއްޖޭގެ 60 ވަނަ މިނިވަން ދުވަހުގައި ހުޅުވި މި ޓާމިނަލް އިން މިހާތަނަށް 37 އެއާލައިނަކަށް ދަނީ ހިދުމަތް ދެމުންނެވެ. މި ޓާމިނަލް ހުޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ.
