ކުރީގައި އޮތްގޮތަށް ސިވިލް ސާވިސް މުވައްޒަފުންގެ ހެދުން އެޅުމުގެ މިންގަނޑު ބަދަލުކޮށްދިނުމަށް ސިވިލް ސާވިސް ކޮމިޝަނުގައި ދަންނަވައިފި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
ހުޅުމާލޭ ފޭސް-1 ގައި ދިރިއުޅުއްވާ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ސިވިލް ސާވިސް މުވައްޒަފުން އޮފީހަށް ވަޑައިގަންނަވާއިރު ހެދުން އެޅުމުގެ މިންގަނޑު ނުވަތަ މުޖުތަމައު ގަބޫލުކުރާ މިންގަނޑަށް ވުރެ މިހާރު ދަށްވެއްޖެ ކަމަށެވެ.
ރައީސް ވިދާޅުވީ ސިވިލް ސާވިސްގެ ގަވާއިދުގައި ހެދުން އެޅުމުގެ މިންގަނޑު އޮތީ ވަރަށް ރަނގަޅަށް ކަމަށާއި، ނަމަވެސް ކޮންމެވެސް ސަބަބަކާހުރެ އެކަން މިހާރު އެއޮތީ ބަދަލުވެފައި ކަމަށެވެ.
"އަޅުގަނޑަށް ގާނޫނުން ލިބިފައި އޮންނަ އިހްތިޔާރުގެ ދަށުން މިހާރު ދަންނަވައިފިން ސިވިލް ސާވިސް ކޮމިޝަނަށް ކުރީގައި އޮތް ގޮތަށް އިޔާދަކޮށްދޭށޭ. ކުރީގައި އޮތްގޮތަށް ގަވާއިދު ބަދަލުކޮށްފަ ގެޒެޓުކޮށްފަ އަމަލުކުރަން ފަށްޓަވާށޭ." ރައީސް ވިދާޅުވި އެވެ.
އެމަނިކުފާނު ވިދާޅުވީ ސިވިސް ސާވިސްގެ މުވައްޒަފުން ސަރުކާރުގެ ރަސްމީ ގަޑިތަކުގައި މަސައްކަތްކުރައްވާއިރު ކުރީގައި އޮތް މިންގަނޑަށް ހެދުން އަޅުއްވާ ގޮތް ރަނގަޅު ކަމަށާއި އެކަން އެގޮތަށް ކުރުމަށް ސިވިލް ސާވިސް ކޮމިޝަނުގައި އެމަނިކުފާނު ދަންނަވައިފި ކަމަށެވެ.
މުވައްޒަފުންގެ ހެދުން އެޅުމާ ބެހޭ ގޮތުން މި ފަހަކަށް އައިސް ފާޑުކިޔާ މީހުން ވަރަށް ގިނަ އެވެ. ހާއްސަކޮށް އިސްލާމްދީނުގެ މިންގަނޑުތަކާ ހިލާފުވާތީ އެވެ. ރައީސް މިކަމަށް އިޝާރާތްކުރައްވާފައި މިވަނީ މިފަދަ ޝަކުވާތައް އެމަނިކުފާނަށް ދަންނަވާތީ އެވެ.
