މާލެ ސިޓީ ކައުންސިލުން ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މުނިސިޕަލް ކަންކަމާ ހަވާލުވާން އެއްބަސްނުވީ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ. އެމަނިކުފާނު މިފަދައިން ވިދާޅުވީ ހުޅުމާލެ ފޭސް-1 ގައި ދިރިއުޅުއްވާ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.
ރައީސް ވިދާޅުވީ ސިޓީ ކައުންސިލްގެ ދަށަށް އެޗްޑީސީގެ މުނިސިޕަލް ހިދުމަތްތައް ގެނައުން އެއީ އެމަނިކުފާނުގެ ވައުދެއް ކަމަށާއި، އެކަމަށް ސަރުކާރުން އެޗްޑީސީ އާއި ކައުންސިލާ އެއްކޮށް މަސައްކަތްތަކެއް ކުރި ކަމަށެވެ. ނަމަވެސް ސިޓީ ކައުންސިލްގެ ފަރާތުން އެކަމަށް އެއްބާރުލުމެއް ނުލިބުނު ކަމަށާއި އެކަން އެގޮތަށް ވާން އެއްބަސް ނުވީ ކަމަށް ރައީސް ވިދާޅުވި އެވެ.
"ސަރުކާރާއި އެޗްޑީސީ އާއި ސިޓީ ކައުންސިލާ އެކީގައި މަސައްކަތްކުރަމުން އައި ކަމެއް މިއީ. އެހެން ނަމަވެސް ސިޓީ ކައުންސިލުން މިތަނުގެ ހުރިހާ މުނިސިޕަލް ހިދުމަތްތަކާ ހަވާލުވާކަށް ބޭނުމެއް ނުވި. ނުވީމާ އެޗްޑީސީން މިހާރު ވަގުތީ ގޮތުން އަދިވެސް އެ ބަލަހައްޓަނީ." ރައީސް ވިދާޅުވި އެވެ.
Advertisement
ރައީސް ވިދާޅުވީ އެމަނިކުފާނު ހުންނެވީ ވައުދު ފުއްދަން ތައްޔާރަށް ކަމަށާއި، އުންމީދު ކުރައްވަނީ ކައުންސިލްގެ ފަރާތުން އަނެއްކާވެސް އެ ނިންމުން ބަދަލުކޮށް އެގޮތަށް އެއްބަސްވާނެ ކަމަށެވެ. އަދި ސިޓީސް މިނިސްޓްރީ އާއި ފިނޭންސް މިނިސްޓްރީން އެކަން އެގޮތަށް ކުރައްވަން ކެބިނެޓުން ނިންމަންޖެހޭ ނިންމުންތައް ނިމިފައިވާ ކަމަށް ވެސް ރައީސް ވިދާޅުވި އެވެ.
މުނިސިޕަލް ކަންކަން ކައުންސިލްގެ ދަށަށް ގެންދިޔުމުގެ މަސައްކަތްތަކެއް މިއަހަރު އެޗްޑީސީގެ ފަރާތުން ކުރިއަށް ގެންދިޔަ އެވެ. އެގޮތުން ސިޓީ ކައުންސިލްގެ ދަށަށް ދާނެ މުވައްޒަފުންގެ ލިސްޓެއް ކަނޑައެޅި ކަމަށް ޚުލާސާ އަށް މައުލޫމާތު ލިބިފައިވެ އެވެ.
