ގަވާއިދާއި ހިލާފަށް ބިދޭސީން ކުރާ ވިޔަފާރިތައް ހުއްޓުވުމަށް ސަރުކާރުން ކުރަމުންދާ މަސައްކަތުގެ ތެރެއިން ތިން ހަފްތާގެ މުއްދަތެެއްގައި ބިދޭސީން ހިންގަމުން އައި 56 ވިޔަފާރިއެއް ބަންދުކޮށްފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެވެ.

ރައީސް މިހެން ވިދާޅުވީ ހުޅުމާލެ ފޭސް 1 ގެ ރައްޔިތުންނާއި ބައްދަލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ގަވާއިދާ ހިލާފަށް ވިޔަފާރިކުރާ ބިދޭސީންގެ މައްސަލައަކީ ބޮޑުވެފައިވާ މައްސަލައެއްކަމަށާއި މިކަމަކީ އާންމު ރައްޔިތުންގެވެސް ބޮޑު ކަންބޮޑުވުމެއްކަމަށެވެ. އަދި މިކަމަށް ހާއްސަ އިސްކަމެއްދީގެން މިދިޔަ ތިން ހަފުތާތެރޭ 56 ވިޔަފާރިއެއް ބަންދުކޮށްފައިވާކަން ރައީސް ފާހަގަކުރެއްވިއެވެ.

"އިތުރަށްވެސް ވަރަށް ގިނަ ކަންކަން އެބަކުރެވޭ، މިގެންދަނީ ރައްޔިތުންގެ ވިންދާ އިހުސާސާއެއްގޮތަށް ކަންކަން ރަނގަޅުކުރުމަށް ފިޔަވަޅުތައް އަޅަމުން، ރައްޔިތުންގެ އެކްސްޕެކްޓޭޝަނާ އެއްވަރަށް ކަންކަން ރަނގަޅުކުރަމަށް މަސައްކަތްކުރަމުން މިދަނީ،" ރައީސް ވިދާޅުވިއެވެ.

ބިދޭސީން ގަވާއިދާ ހިލާފަށް ފުޅާދާއިރާއެއްގައި ވިޔަފާރި ކުރަމުންދާ މައްސަލަ ހައްލު ކުރުމަށް، "ނެޝަނަލް ޓާސްކްފޯސް އޮން ކޮމްބެޓިން އިލީގަލް އެކްސްޕެޓްރިއޭޓް އޮޕަރޭޝަންސް އެންޑް ބިޒްނަސަސް"ގެ ނަމުގައި ހާއްސަ ޓާސްކްފޯހެއް ވަނީ އެކުލަވާލާފައެވެ.

މިއީ، އިކޮނޮމިކް މިނިސްޓްރީ، ހޯމް މިނިސްޓްރީ، ދިވެހި ފުލުހުންގެ ހިދުމަތުގެ އިތުރުން އިމިގްރޭޝަން ހިމެނޭ ގޮތަށް އެކުލަވާފައިވާ ޓާސްކް ފޯހެކެވެ. މި ޓާސްކްފޯހުން ދަނީ، ރާއްޖޭގައި ގަވާއިދާ ހިލާފަށް ހިންގަމުންދާ ކަމަށް ބެލެވޭ ވިޔަފާރިތައް ބަލައި ފާސްކުރަމުންނެވެ. އަދި މި އޮޕަރޭޝަނުގެ ތެރެއިން ގަވާއިދާ ހިލާފަށް އުޅޭ ބިދޭސީން ދެނަގަނެ އެ ފަރާތްތަކަށްވެސް ދަނީ ފިޔަވަޅު އަޅަމުންނެވެ.