ސައްހަ ނޫން ޑޮލަރު ބޭނުންކޮށްގެން ވިޔަފާރިކުރި މީހަކު ހޯދުމަށް އާންމުންގެ އެހީއަށް ފުލުހުން އެދިއްޖެ އެވެ.
މިކަމާ ގުޅިގެން ފުލުހުން އެކްސްގައި ވީޑިއޯކޮޅަކާއެކު ހިއްސާކުރި ޕޯސްޓެއްގައި ބުނީ، ސައްހަ ނޫން ޑޮލަރުން މުއާމަލާތްކޮށްފައިވާ މައްސަލައެއްގެ ތުހުމަތުގައި މީހަކު ހޯދުމުގެ މަސައްކަތް ފުލުހުން ކުރަމުން އަންނަ ކަމަށެވެ.
ފުލުހުން އެކްސްގައި ހިއްސާކުރި ވީޑިއޯއިން ފެންނަނީ އޮރެންޖު ކުލައިގެ ޓީޝާޓެއްގައި ހުންނަ މީހަކު މާލޭ ޓޭކް އަވޭ ހޮޓަލެއްގެ ކައިރީ ހުންނަ ތަނެވެ. އޭނާ ނެގި ބައެއް ތަކެއްޗަށް ފައިސާ ދޭ މަންޒަރު އެ ވީޑިއޯއިން ފެނެ އެވެ. އެ މީހާ ހޯދުމަށް އާންމުންގެ އެހީއަށް ފުލުހުން އެދިފައިވަނީ އެ މީހާއަކީ ކާކުކަން ދެނެގަނެވިފައިނުވުމުގެ ސަބަބުން އެ މީހާ ހޯދިފައިނުވާތީ އެވެ.
Advertisement
އެ ވީޑިއޯއިން ފެންނަ މީހާއާ ބެހޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ އެ މައުލޫމާތެއް ފުލުހުންގެ އިކޮނޮމިކް ކްރައިމް އިންވެސްޓިގޭޝަންގެ ނަމްބަރު 9790048 އަށް ނުވަތަ ފުލުހުންގެ ހޮޓްލައިން ނަމްބަރު 3322112 އަށް ގުޅުއްވައި މައުލޫމާތު ހިއްސާކުރުމަށް ފުލުހުން ވަނީ އެދިފަ އެވެ.
މިފަދަ މީހުން ހޯދުމުގައި އާންމުންގެ ފަރާތުން ފުލުހުންނަށް ލިބޭ އެއްބާރުލުމަށް ފުލުހުން ވަނީ ޝުކުރު އަދާކޮށްފަ އެވެ.
