ދިވެހިރާއްޖޭގެ ހާއްސަ އިގުތިސާދީ ސަރަހައްދުގައި ގާނޫނާ ހިލާފަށް ހަރަކާތްތެރިވަމުންދިޔަ ސްރީލަންކާގެ ދެ މަސްބޯޓެއް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ކޯސްޓްގާޑުގެ ބެލުމުގެ ދަށަށް ގެނެސްފި އެވެ.
މިކަމާ ގުޅިގެން އެމްއެންޑީއެފް އިން ދާދި ދެންމެ އެކްސްގައި ހިއްސާކުރި ޕޯސްޓެއްގައި ބުނީ، މި ބޯޓުތައް ހިފަހައްޓާފައި ވަނީ، ސަރަހައްދީ ގައުމުތަކުން ހިއްސާކުރި މައުލޫމާތުގެ ޒަރިއްޔާއިން، އެއްކުރި މައުލޫމާތުގެ އަލީގައި އެމްއެންޑީއެފް ކޯސްޓްގާޑާއި، އެމްއެންޑީއެފް އެއާ ކޯ އިން ހިންގި ސަވެއިލަންސް އޮޕަރޭޝަނެއްގެ ތެރެއިން ކަމަށެވެ.
އެމްއެންޑީއެފް އިން ހާމަކޮށްފައިވާ ގޮތުގައި، ސްރީލަންކާއަށް ނިސްބަތްވާ މި ބޯޓުތައް ކޯސްޓްގާޑުގެ ބެލުމުގެ ދަށަށް ގެނެސްފައި ވަނީ އިއްޔެ ހެނދުނު 08:30 ހާއިރު، ހއ. ކެލާގެ އިރުން 51 ނޯޓިކަލް މޭލު ބޭރުގައި ހަރަކާތްތެރިވަމުން ދަނިކޮށެވެ.
މި ދެ ބޯޓު ކުޅުދުއްފުށި ސިޓީ ބަނދަރަށް ވައްދައި ފުލުހުންނާ މިހާރު ހަވާލުކޮށްފައިވާ ކަމަށާއި، ފުލުހުން މިހާރު ދަނީ މިކަމާ ގުޅޭ ތަހުގީގު ކުރިއަށްގަންދަމުން ކަމުގައި ވެސް އެމްއެންޑީއެފް އިން ވަނީ ބުނެފަ އެވެ.
ރާއްޖޭގެ ހާއްސަ އިގުތިސާދީ ސަރަހައްދަށް ގާނޫނާ ހިލާފަށް ބޭރު ގައުމުތަކުގެ މަސް ބޯޓުތައް ވަންނަ މައްސަލަ މަދުން ނަމަވެސް ފެންމަތިވެ އެވެ. މީގެ ކުރިން މިފަދަ ބޯޓުތައް ހޯދުމަށް ދަތިތަކެއް ކުރިމަތިވީ ނަމަވެސް، ރާއްޖޭގައި އަސްކަރީ ޑްރޯން ބޭނުންކުރަން ފެށުމާއެކު މިފަދަ ބޯޓުތައް ހޯދައި ދެނެގަތުމަކީ މިހާރު އެހާ އުނދަގޫ ކަމަކަށް ނުވެ އެވެ.
