އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި ކުރީގެ ޑިފެންސް މިނިސްޓަރު ޔޯވް ގަލަންޓް ހައްޔަރުކުރުމުގެ އަމުރު އިސްތިއުނާފު ކުރުމަށް އިންޓަރނޭޝަނަލް ކްރިމިނަލް ކޯޓް (އައިސީސީ) އަށް ހުށަހަޅަފައިވާ މައްސަލައިގައި ކުރީގެ ޙުކުމް ދަމަހައްޓައިފިއެވެ.
ހޭގްގެ ކޯޓުގެ ފަސްފަނޑިޔާރުންގެ ތެރެއިން ތިންފަނޑިޔާރުން ނިންމީ އެ އަމުރުތައް ދަމަހައްޓާށެވެ. މާނައަކީ އެއީ ޤާނޫނީ ގޮތުން ޞައްޚަ އަމުރުތަކެއް ކަމަށެވެ.
ނަތަންޔާހޫ އާއި އޭނާގެ ކުރީގެ ޑިފެންސް މިނިސްޓަރުގެ މައްޗަށް ތުހުމަތު ކޮށްފައި ވަނީ ޣައްޒާގައި ހިންގި ޤަތުލުއާންމާއި ބޮޑެތި ޖަރީމާ ތަކެވެ.
އިސްރާއީލުން މި މައްސަލަ އިސްތިއުނާފަށް ހުށަހެޅީ 7 އޮކްޓޯބަރު 2023 ގައި އިސްރާއީލުގެ ދެކުނަށް ޙަމާސް އިން ދިން (ކެތް ނުވެގެން ދިން ރައްދު) ޙަމަލާ އާއި ގުޅިގެން އިސްރާއީލުން ޣައްޒާނއާއި ދެކޮޅަށް ކުރި ހަނގުރާމައިގެ އިބްތިދާއީ ތަޙްޤީޤަކަށް ހުޅުވަން ނިންމުމުންނެވެ.
އިސްރާއީލުން ކޯޓުގައި ބުނީ އެ ފަދަ ފިޔަވަޅުތަކެއް އަޅާ ނަމަ ކުރިން އަންގަން ޖެހޭނެ ކަމަށެވެ. އަދި އައިސީސީން ކުރިން އެކަން އެންގި ނަމަ ތިމަންނާމެންނަށް ޙަމާސް އާއި ވާހަކަ ދައްކައިގެން މައްސަލަތައް ޙައްލު ކުރެވިދާނެ ކަމަށެވެ. ނަމަވެސް އައިސީސީން ވަނީ އިސްރާއީލުން ޖަރީމާތަކުން ރެކެން ވެގެން ދެއްކި ނާތަހުޛީބު ވާހަކަތައް ބަލައިގަތުމަށް އިންކާރު ކޮށްފައެވެ.
