ބިދޭސީން ވަޒީފާ އަދާކުރުމާ ބެހޭ ގަވާއިދަށް ބޮޑު އިސްލާހެއް ގެނެސް، ނަރުހުންނާއި ޓީޗަރުން ފަދަ އެތައް ވަޒީފާއަކަށް ބިދޭސީން ގެނައުން މަނާކުރެވޭ ގޮތް ހަދައިފިއެވެ.

ދިވެހިރާއްޖޭގައި ބިދޭސީން ވަޒީފާ އަދާކުރުމާ ބެހޭ ގަވާއިދަށް ބޮޑެތި ބަދަލުތަކެއް ގެނެސް ހޯމް މިނިސްޓްރީން ވަނީ މިދިޔަ އާދީއްޔަ ދުވަހު ގެޒެޓުކޮށްފައެވެ.

އެ ގަވާއިދަށް ގެނެސްފައިވާ އިސްލާހުތަކުގައި ބިދޭސީންގެ ވޯކްޕާމިޓްގެ އުސޫލުތަކަށް ވަނީ ބޮޑެތި ބަދަލުތަކެއް ގެނެސްފައެވެ. އަދި ރާއްޖޭގައި މަސައްކަތް ކުރުމަށް ބައެއް ދާއިރާތަކުން ބިދޭސީން ނުގެނެވޭގޮތަށް ސަރުކާރުން ނިންމާފައިވާ ނިންމުން ތަންފީޒުކުރުމަށް ކަނޑައަޅާގޮތް ބަޔާންކޮށްފައެވެ.

އެގޮތުން މިގަވާއިދަށް އަމަލުކުރަން ފަށާތާ ދެ އަހަރަށްފަހު ހެއާ ޑްރެސަރުންނާއި، ބިއުޓީޝަން، ބޭބީ ސިޓަރުން، ޕާސަނަލް ޓްރެއިނަރުން، އިލެކްޓްރީޝަނުން، ގެސްޓް ރިލޭޝަން އޮފިސަރުން (އިންގްލިޝް)، ޓުއަ ގައިޑުން، އެކައުންޓެންޓުން އަދި އިމާމުން ނުގެނެވޭނެއެވެ. އަދި ގަވާއިދަށް އަމަލުކުރަން ފަށާތާ ތިން އަހަރުގެ ތެރޭގައި ޑައިވަރުން، ނަރުހުން، ބިލްޑިން އިންސްޕެކްޓަރުން، ސަވޭޔަރުން، ސައިޓް ސުޕަވައިޒާ އަދި ޕައިލެޓުންގެ ވަޒީފާތަކަށް ބިދޭސީން ރާއްޖެއަށް ގެނައުން މަނާވާނެއެވެ.

މިގަވާއިދަށް އަމަލުކުރަން ފަށާތާ އަހަރުގެ ތެރޭގައި އިލެކްޓްރިކަލް އިންޖިނިއަރުން އަދި ޑައިވް އިންސްޓްރަޓަރުންގެ ވަޒީފާއަށް ބިދޭސީންނަށް ކޯޓާ ދިނުން މަނާވާނެއެވެ. އަދި މިގަވާއިދަށް އަމަލު ކުރަން ފަށާތާ ފަސް އަހަރުގެ ތެރޭގައި ހައުސް ކީޕިން މެނޭޖަރުން، ހިއުމަން ރިސޯސް މެނޭޖަރުން އަދި ފްރަންޓް އޮފީސް މެނޭޖަރުންގެ ލެވެލްގެ މަގާމުތަކަށް ބިދޭސީންނަށް ނާދެވޭނެއެވެ. މީގެއިތުރުން ޕްރައިމަތީ އަދި ސެކަންޑަރީ ޓިޗަރުންގެ ގޮތުގައިވެސް ރާއްޖެއަށް ބިދޭސީންނަށް ކޯޓާ ދިނުންވަނީ މަނާކޮށްފައެވެ.

މި ބަދަލުތަކުގެ އެންމެ ބޮޑު މަޤްސަދަކީ ވަޒީފާގެ ބާޒާރު ހަމަޖައްސައި ދިވެހީންނަށް އިސްކަންދިނުމެވެ.

އެގޮތުން ދެ އަހަރުގެ ތެރޭގައި ހެއާ ޑްރެސަރުން، ބިއުޓީޝަނުން، ބޭބީ ސިޓާސް، ޕާސަނަލް ޓްރެއިނާސް، އިލެކްޓްރީޝަނުން، އިނގިރޭސި ގެސްޓް ރިލޭޝަން އޮފިސަރުން، ޓުއާ ގައިޑުން، އެކައުންޓެންޓުން އަދި އިމާމުންގެ ކޯޓާ ބާތިލުކުރެވޭނެއެވެ.

ތިން އަހަރުގެ ތެރޭގައި ޑައިވަރުން، ނަރުހުން، ބިލްޑިން އިކްސްޕެކްޓަރުން، ސާވޭޔަރުން، ސައިޓް ސުޕަވައިޒަރުން އަދި ޕައިލެޓުންގެ ކޯޓާ ބާތިލުކުރަން ޖެހޭނެއެވެ.

ހަތަރު އަހަރުގެ ތެރޭގައި އިލެކްޓްރިކަލް އިންޖީނިއަރުންނާއި ޑައިވް އިންސްޓްރަކްޓަރުންގެ ކޯޓާތައް ބާތިލުކުރެވޭނެއެވެ.

އަދި ފަސް އަހަރުގެ ތެރޭގައި ހައުސް ކީޕިން މެނޭޖަރުން، ހިއުމަން ރިސޯސް މެނޭޖަރުން، ޕްރަންޓް އޮފީސް މެނޭޖަރުން އަދި ޕްރައިމަރީ އަދި ސެކަންޑަރީ ޓީޗަރުންގެ ކޯޓާތައް ބާތިލުކުރެވޭނެއެވެ.

ރާއްޖޭގެ ވަޒީފާގެ ބާޒާރުގައި ބައެއް ދާއިރާތައް ހަމައެކަނި ދިވެހީންނަށް ހާއްސަ ކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މުހިއްމު ސިޔާސަތެކެވެ. އޭގެ ތެރޭގައި ފަންނުވެރިކަމާއި، ފަތުރުވެރިކަމުގެ ސިނާއަތުގެ އިތުރުން ދިވެހީންގެ ތެރޭގައި އެމަސައްކަތް ކުރުމުގެ ޝައުގު ހުންނަ އަދި އެދާއިރާތަކުން މަތީ ތައުލީމު ހާސިލުކޮށްފައިވާ ދިވެހީން ތިބި ދާއިރާތައް ހިމެނެއެވެ.