ނިމިދިޔަ ސަރުކާރުން އެއްވެސް ޕްލޭނެއް ނެތި މާލެ ރައްޔިތުންނަށް ބަހާލި ގޯތިތައް ދިނުމަށްޓަކައި ފޭސް 3 އިން ހިއްކާ ސަރަހައްދުގެ 50 އިންސައްތަ މަސައްކަތް ނިމިއްޖެ އެވެ.
ގޯތި ދިނުމަށްޓަކައި ފޭސް 3 ހިއްކަން އެންމެ ފުރަތަމަ ފަށާފައިވަނީ ސެޕްޓަމްބަރު 2023 ގަ އެވެ. ނަމަވެސް ހުޅުމާލެ މާސްޓާ ޕްލޭން ރިވައިސް ކުރުމަށްޓަކައި އޭރު މަސައްކަތް ވަނީ މެދުކަނޑާލާފަ އެވެ. އެ މަސައްކަތް ނިމިދިޔަ މަހު އަލުން ފަށައި ޖުމްލަ 31.5 ހެކްޓަރުގެ ބިން ހިއްކައިފައިވާ ކަމަށް އެމްއޭސީއެލުން މައުލޫމާތު ދެއެވެ. މުޅި ޖުމްލަ ހިއްކަން ހަމަޖެހިފައި އޮތީ 63 ހެކްޓަރުގެ ބިމެވެ.
އެ މަޝްރޫއުގެ މަސައްކަތް ނިންމައި ވީހާވެސް އަވަހަށް އެ ބިމުން ބޯހިޔާވަހިކަން ދިނުމަކީ ރައީސުލްޖުމްހޫރިއްޔާގެ އަމާޒެވެ.
މީގެ ކުރިން ރައީސް އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ އަހަރުގެ ނިޔަލަށް ފޭސް 3 އެއްކޮށް ހިއްކައި ނިމޭނެ ކަމަށާއި އެމަސައްކަތް ނިމުމުން ގިރާވަރުފަޅު ހިއްކުމުގެ މަސައްކަތް ކުރިއަށް ދާނެ ކަމަށެވެ. މި ދެ މަސައްކަތް ހަލުވި ކުރުމަށްޓަކައި ބޮޑު ޑްރެޖަރެއް ވަނީ ރާއްޖެ ގެނެސްފަ އެވެ. އެއާއެކު ދެ ޑްރެޖަރު އެ ސަރަހައްދުތައް ހިއްކަން ބޭނުންކުރާނެ އެވެ.
މީގެ އިތުރުން ރަސްމާލެ ހިއްކުމަށްޓަކައި ވެސް ދުނިޔޭގައި އޮތް އެންމެ ބޮޑު ދެ ޑްރެޖަރުގެ ތެރެއިން ޑްރެޖަރެއް ވަނީ ރާއްޖެ އައިސް މި މަހުގެ އެއް ވަނަ ދުވަހު ހިއްކުމުގެ މަސައްކަތް ފަށާފަ އެވެ.
މާލެ ސަރަހައްދަށް ދިމާވެފައިވާ ބޯހިޔާވަހިކަމަށް ޓޯޓަލް ސޮލިއުޝަނެއް ގެނެސްދެއްވާނެ ކަމަށް ރައީސް ވަނީ ވައުދުވެފަ އެވެ. އެގޮތުން މާލެ ސިޓީގައި 7،500 ހައުސިން ޔުނިޓު އަޅައި ރަސްމާލެއިން 25،000 ގޯތި ދިނުމަށް ވަނީ ހަމަޖެހިފަ އެވެ.
