ދިވެހިރާއްޖޭގައި ޖުވާ ކުޅުމާއި ޖުވާ ކުޅޭ ތަންތަން ހިންގުން ޖިނާއީ ކުށެއްގެ ގޮތުގައި ކަނޑައެޅުމަށް ދިވެހިރާއްޖޭގެ ގާނޫނުލް އުގޫބާތަށް އިސްލާހު ގެނައުމުގެ ބިލެއް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ރައްޔިތުންގެ މަޖިލީހަށް ފޮނުއްވައިފި އެވެ.

އެކްސްގައި މިކަން އިއުލާނުކުރައްވާ ރައީސް ވިދާޅުވީ، މިއީ އިސްލާމް ދީނުގައި ހަރާމްކޮށްފައިވާ ކަމަކަށް ވާއިރު، ރާއްޖޭގައި މިފަދަ ކަންކަން މަދުން ނަމަވެސް ފެންނަމުންދާތީ، އެކަން ހުއްޓުވުމަށް އެޅުއްވި މުހިންމު ފިޔަވަޅެކެވެ.

ޖުވާ ކުޅުމަކީ އިސްލާމް ދީނުގައި ހަރާމްކޮށްފައިވާ ކަމަކަށްވާއިރު، ރާއްޖޭގައި މަދުން ނަމަވެސް އެ މަންޒަރުތައް ދަނީ ފެންނަމުންނެވެ. ހާއްސަކޮށް އޮންލައިންކޮށް ޖުވާ ކުޅޭ މީހުންގެ އަދަދު ވަރަށް ގިނަ އެވެ. ރައީސް މުއިއްޒު ވެރިކަމަށް ވަޑައިގެންނެވުމަށް ފަހު އެފަދަ ސައިޓްތައް ބްލޮކް ކުރުމުގެ މަސައްކަތް ވަނީ ފައްޓަވާފަ އެވެ.

އެގޮތުން، މިދިޔަ އަހަރުގެ ޖުލައި މަހުގެ ތެރޭގައި ދިވެހި ފުލުހުން ވަނީ އެ ފަދަ ހަތަރުވަރަކަށް ސައިޓު ބްލޮކް ކުރަން ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އަށް ހުށަހަޅާފަ އެވެ. އެއާ އެކު އޭރު ބައެއް ސައިޓުތައް ބްލޮކް ވެސް ކުރި އެވެ. އޭގެ ތެރެއިން "ކިރަބެޓް" ނަމަކަށް ކިޔާ ސައިޓެއް ވެސް ބްލޮކް ކުރިއެވެ.