ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި މަހުގެ 16 ވަނަ ދުވަސްވާ އަންގާރަ ދުވަހުގެ ރޭ ގަލޮޅުގެ ރައްޔިތުންނާ ބައްދަލުކުރެއްވުމަށް ނިންމަވައިފި އެވެ.

ރައީސް ޑރ. މުއިއްޒު ގަލޮޅުގެ ރައްޔިތުންނާ ބައްދަލުކުރެއްވުން އޮންނާނީ އެ ދުވަހުގެ ރޭ 20:30 ގައި އިމާދުއްދީން ސްކޫލްގަ އެވެ. މާލޭގެ އަވަށްތަކުގެ ރައްޔިތުންނާ އެމަނިކުފާނު ބައްދަލުކުރެއްވުމުގެ މައިގަނޑު މަގުސަދަކީ ރައްޔިތުންނާ ވީހާވެސް ގާތުން ބައްދަލުކުރައްވައި ރައްޔިތުންގެ ހިޔާލާއި މަޝްވަރާ ހޯއްދެވުމުގެ އިތުރުން ރައްޔިތުން އެންމެ ބޭނުންވާ ކަންކަން ދެނެގަތުމެވެ.

މިހާތަނަށް ރައީސް ވަނީ މާލޭގެ ހަތަރު އަވަށެއްގެ ރައްޔިތުންނާ ބައްދަލުކުރައްވައިފަ އެވެ. އެގޮތުން މިހާތަނަށް ވަނީ ވިލިމާލެ، މައްޗަންގޯޅި، މާފަންނުގެ އިތުރުން ހެންވޭރުގެ ރައްޔިތުންނާ ބައްދަލުކުރައްވައި، ރައްޔިތުންގެ ޝަކުވާތައް އަޑުއައްސަވައި ރައްޔިތުންގެ ސުވާލުތަކަށް ޖަވާބު ދެއްވަމުންނެވެ.

ހިޔާލު ހުށަހަޅައި ކަންބޮޑުވުން ފާޅުކުރުމުގެ އިތުރުން، ރައީސަށް ސިޓީ ފޮނުއްވަން ބޭނުންވާ ފަރާތްތަކަށް އެ ފުރުސަތުވެސް މި ބައްދަލުވުންތަކުގައި ބޮޑުތަނުން ފަހިކޮށްދީފައި އޮންނަކަން ފާހަގަކޮށްލަންޖެހެ އެވެ.

ގަލޮޅު ރައްޔިތުންނާ ބައްދަލުކުރެއްވުމަށްފަހު ހުޅުމާލެ ފޭސް އެކެއް އަދި ފޭސް ދޭއްގައި ދިރިއުޅޭ ރައްޔިތުންނާވެސް ރައީސް ބައްދަލުކުރައްވާނެ ކަމަށް ބެލެވެ އެވެ.