މި ސަރުކާރުން ކޮރަޕްޝަނަށް އެއްވެސް ޖާގައެއް ނުދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީބައިނަލްއަގްވާމީ އެންޓި ކޮރަޕްޝަނުގެ ދުވަހާ ގުޅިގެން ފޮނުއްވި މެސެޖެއްގަ އެވެ.
ރައީސް ވިދާޅުވީ ސަރުކާރުގެ ހުރިހާ މަސައްކަތެއްވެސް ހިންގާނީ ވަރަށް ހާމަކަމާއި، ޒިންމާދާރުކަމާއެކު ކަމަށެވެ. އަދި ސަރުކާރުގެ އެއްވެސް މުވައްޒަފަކަށް ކޮރަޕްޝަނަށް އަރައިގަތުމުގެ ފުރުސަތެއް ނުދެއްވާނެކަމަށާއި، ކޮރަޕްޝަނުގެ އަމަލުތައް ހިންގާ ފަރާތްތަކާމެދު ފިޔަވަޅު އަޅުއްވާނެކަމަށް އެމަނިކުފާނުގެ މެސެޖުގައިވެ އެވެ.
2007 ވަނަ އަހަރު އދ. ގެ ކޮންވެންޝަން އެގެއިންސްޓް ކޮރަޕްޝަން (ޔޫއެންސީސީ) ގައި ބައިވެރިވުމަކީ ރާއްޖެއަކީ ކޮރަޕްޝަނާ ދެކޮޅު ބައެއްކަން ދައްކުވައިދޭ ކަމެއް ކަމަށް އެމަނިކުފާނު ފާހަގަކުރެއްވި އެވެ. ރައީސް ވިދާޅުވީ އެ މުއާހަދާގެ އުސޫލުތައް ހާމަކަން ބޮޑު އަދި ސާބިތުކަމާއެކު ނެގެހެއްޓުމަށް ރާއްޖެއިން އަބަދުވެސް މަސައްކަތް ކުރައްވާނެ ކަމަށެވެ.
ނިޒާމީ ކޮރަޕްޝަނުގެ ގާނޫނީ ވެރިކަން ފުނޑުފުނޑުވެ، ދެމެހެއްޓެނިވި ތަރައްގީ އަށް ހުރަސްއެޅި، ޑިމޮކްރެޓިކް ނިޒާމު ބަލިކަށިވެ، ރައްޔިތުންގެ އަސާސީ ހައްގުތައް ނިގުޅައިގަނެވޭނެ ކަމަށް ރައީސްގެ މެސެޖުގައި ވަނީ ފާހަގަކޮށްފަ އެވެ.
ރައީސް ވިދާޅުވީ ރާއްޖެ ޒަމާނީ ފެންވަރަށް ގެނައުމާއި، ސަރުކާރުގެ މުއާމަލާތްތައް ދެފުށް ފެންނަ ގޮތަށް ކަންކަން ހިންގުމަށްޓަކައި ސަރުކާރުން ފަށާފައިވާ މޯލްޑިވްސް 2.0 ގެ މަސައްކަތަކީ ކަންކަން ހިނގުން ހަރުދަނާ ވެގެން ދާނެ މަޝްރޫއެއް ކަމުގައި ވިދާޅުވެފަ އެވެ. އަދި ގާނޫނުލްއުގޫބާތަށް ގެނެވުނު ބަދަލުތަކުގެ ތެރެއިން އެސެޓް ރިކަވަރީގައިއ ެންޓި ކޮރަޕްޝަން ކޮމިޝަނުން ކުރާ މުހިންމު މަސައްކަތްތަކަށް އެމަނިކުފާނު އަލިއަޅުއްވާލެއްވި އެވެ.
އެންޓި ކޮރަޕްޝަން ޕްލޭނާ އެއްގޮތްވާ ގޮތުގެ މަތިން 20 އަހަރުގެ ގައުމީ ތަރައްގީގެ ޕްލޭނާއި "ހިންމި" ކޮރަޕްޝަން ރިސްކް ސެލްފް އެސެސްމަންޓް ޓޫލްކިޓް ތައާރަފްކުރުމާއި ސަރުޚާރުގެ މުއައްސަސާތަކަށް ތަމްރީނު ލިބިފައިވާ ހަރުދަނާ މުވައްަފުން ލިބޭނެ އިންތިޒާމާއި، އެންޓި ކޮރަޕްޝަން އެކަޑަމީއެއް އުފެއްދުން ވެސް ހިމެނޭ ކަމަށް ރައީސް ފާހަގަކުރެއްވި އެވެ.
ބައިނަލްއަގްވާމީ ގުޅުންތައް އިތުރަށް ބަދަހިކުރުމާއި، އިޖުތިމާއީ ޒިންމާދާރުކަމާއި، މަދަނީ ޖަމިއްޔާތަކާއި ޔޫއެންސީއޭސީގެ ރިވިއު މެކޭނިޒަމްތަކުގެ ތެރެއިން ކުރައްވަމުން ގެންދަވާ މަސައްކަތްތަކަށް ޝުކުރު އަދާކުރައްވަމުން ރައީސް ވިދާޅުވީ ހަމައެކަނި ސަރުކާރުން އަޅާ ފިޔަވަޅުތަކުން ފުއްދާލެވެން ނެތް ކަމަށާއި އަމިއްލަ ފަރުދުންނާއި އަމިއްލަ ފަރާތްތަކުން މިކަމުގައި ބައިވެރވުން މުހިންމުކަން ފާހަގަކުރައްވާފަ އެވެ.
ގައުމަށް އަމާނާތްތެރިވުމާއި، އިހްލާސްތެރިވުމާއި ދެފުށް ފެންނަ އުސޫލުތައް ހިފެހެއްޓެވުމަށް އެމަނިކުފާނު އިލްތިމާސްކުރެއްވި އެވެ. އަދި ހަމަހަމަކަމާއެކު އަދުލު އިންސާފު ގާއިމްކުރާނެ ގައުމެއްގެ ގޮތުގައި މި ސަރުކާރު އަބަދުވެސް މަސައްކަތް ކުރައްވާނެ ކަމުގެ ޔަގީންކަން އެމަނިކުފާނު ދެއްވި އެވެ.
ޑިސެންބަރު މަހުގެ 9 ވަނަ ދުވަހަކީ 2003 ވަނަ އަހަރު އދ. ގެ އާންމު މަޖިލީހުން ޔޫއެންސީއޭސީ ބަލައިގަތުމާ ގުޅިގެން ފާހަގަކުރާ ބައިނަލްއަގްވާީ އެންޓި ކޮރަޕްޝަން ދުވަހެވެ.
