ޔޫރަޕަކީ “ބަލިކަށި، ލީޑަރުން ތަކެއް އިސްކޮށް ތިބެ ހިންގަމުންދާ “ހަލާކުވަމުން އަންނަ” ޤައުމުތަކުގެ ޖަމާޢަތެއްގެ ގޮތުގައި އެމެރިކާގެ ރައީސް ޑޮނަލްޑް ޓްރަމްޕް ސިފަ ކުރައްވައިފިއެވެ.

މިއީ މިހާތަނަށް އެމެރިކާއިން ޔޫރަޕަށް ދިން އެންމެ ވަރުގަދަ އެއް “ޙަމަލާ” ކަމަށް ވާއިރު، ޓްރަމްޕް ވިދާޅުވީ ޔޫރަޕިއަން ޔޫނިއަނަށް ގޮންޖެހުންތައް މެނޭޖް ނުކުރެވޭ ކަމަށް ވެސް ވިދާޅުވެފައެވެ.

ޔޫރަޕްގެ ބޯޑަރުތަކަށް އިޝާރާތް ކުރައްވައި ޓްރަމްޕް ވިދާޅުވީ، އެ ބޯޑަރު ތަކުގެ ކޮންޓްރޯލް ވަނީ ގެއްލިފައި ކަމަށާއި، ހިޖުރަކުރާ މީހުން ޗެކުކުރުމުގެ ޤާބިލް ކަމެއް ވެސް ޔޫރަޕުގެ ވެރިންގެ ކިބައިގައި ނެތް ކަމަށެވެ.

ނަމަވެސް ޓްރަމްޕް ވަނީ ހަންގޭރީ އާއި ޕޮލެންޑް އިސްތިސްނާ ކުރައްވާފައެވެ. އޭނާ ވިދާޅުވީ، އެ ޤައުމުތަކުގެ ސިޔާސަތުތައް ހަރުކަށި ކަމަށް ވިދާޅުވެ ތައުރީފު ކުރައްވާފައެވެ.

ޓްރަމްޕުގެ މި “ޙަމަލާ”ތަކުގެ ސަބަބުން ޔޫރަޕްގެ ވެރިން ވަނީ ވަރަށް ބޮޑަށް ހިތްހަމަ ނުޖެހި، ޓްރަމްޕުގެ ޚާރިޖީ ސިޔާސަތާ މެދު ފާޑުކިޔާފައެވެ.

ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ ވިދާޅުވީ ވޮޝިންޓަނުން އިއްތިހާދުގެ ޤައުމުތަކުގެ ދާޚިލީ ކަންކަމާއި ނުބެހުމަށް ވެސް ބުނެފައެވެ. އަދި އެއީ ޔޫރަޕްގެ އެތެރޭގެ ސިޔާސަތަށް ސީދާ ތަދައްޚުލުވުން ކަމަށް ބުނެ އިންޒާރު ދީފައެވެ.

ޓްރަމްޕް ބޭނުންފުޅު ވަނީ ހިޖުރަ ކުރުމާއި ދެކޮޅަށް އޭނާ ގެންގުޅުއްވާ އެޖެންޑާ އަށް ޔޫރަޕް ވެސް ބައްޓަން ކުރުމަށެވެ.