ޓްރެފިކް ޖޫރީމަނާގެ މައްސަލައަކީ ވަކި އުސޫލެއް ގެޒެޓް ކުރެވި އެމީހަކަށް ދައްކަން ފަސޭހަ ގޮތަކަށް އޮންނަ ކަމެއް ކަމަށާއި މިހާތަނަށް 1،000 އެއްހާ މީހުންނާ އެކު އެގްރީމަންޓް ހަދައިގެން ކުރިއަށްދާ ކަމަށް ރައީސް ވިދާޅުވެއްޖެ އެވެ.
ހެންވޭރު ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ އުސޫލުގެ ތެރެއިން ބަހާލައިގެން ޖޫރިމަނާގެ ފައިސާ ދައްކާގޮތަށް އޮތީ ހަމަޖެހިފައިވާ ކަމަށާއި މިފަދަ ޖޫރިމަނާގެ ސަބަބުން ދިރިއުޅުމާ ގުޅިފައިވާ ކަންކަމަށް އެޅޭ ހުރަސްތަކަށް ގެނެވޭނެ އެންމެ ރަނގަޅު ހައްލު ގެނެސްދެއްވާނެ ކަމަށެވެ.
"މައާފް ކުރުމާއި ނުކުރުން އެއީ ދެން އޮތް ކަމަކަމަށް އޮންނާނީ. އެހެން ނަމަވެސް އުސޫލަކުން ބަހާލައިގެން ދައްކާ ގޮތަށް މިހާރު އެއޮތީ ހަމަޖެހިފަ." ރައީސް ވިދާޅުވި އެވެ. ރައީސްގެ މި ވާހަކަފުޅުން ޖޫރިމަނާ މައާފްކުރުމުގެ ވިސްނުމެއް ގެންގުޅެނީ ކަމަށް ވެދާނެ އެވެ.
ރައީސް ޔާމީންގެ ސަރުކާރުގައި ޓްރެފިކް އަދި ލައިސަންސް ޖޫރިމަނާ އެއްކޮށް މައާފްކޮށްދެއްވި އެވެ. އަދި ރައީސް ސޯލިހުގެ ސަރުކާރުގައި ޖޫރިމަނާ އޮތަސް ލައިސަންސް ނެގޭ ގޮތަށް ހެދި އެވެ. ނަމަވެސް އެކަންވީ ރައްޔިތުންނަށް ބޮޑު ތަކުލީފަކަށެވެ.
މާލޭގެ ޕާކިން އަށް ހައްލެއް ގެނެސްދެއްވުމަށް މާލެ ސިޓީގެ ހަތަރު ސަރަހައްދެއްގައި ޕާކިން ބިލްޑިން އެޅުމުގެ މަސައްކަތް އިންޑިއާގެ ލައިން އޮފް ކްރެޑިޓްގެ ތެރެއިން ހަމަޖެހިފައިވާ ކަމަށް ރައީސް ވަނީ މިރޭ ވިދާޅުވެފަ އެވެ.
ރައީސް ވިދާޅުވި ގޮތުގައި ޕާކިން ބިލްޑިން އެޅުމަށް ހަމަޖެހިފައިވަނީ މާލޭގެ ދެ ސަރަހައްދެއްގައި، ވިލިމާލޭގެ އިތުރުން ހުޅުމާލޭގައި ކަމަށެވެ.
