ރައީސް އަބްދުﷲ ޔާމީންގެ ސަރުކާރުގެ ހިޔާ ފުލެޓުގެ ލިޔުން ލިބި ނިމިދިޔަ ސަރުކާރުން ނުލިބޭނެ ކަމަށް ކަނޑައެޅި ފުލެޓުތައް ވައުދާ އެއްގޮތަށް މި ސަރުކާރުން ދޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.

ހެންވޭރު ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ އެމަނިކުފާނު ރިޔާސީ އިންތާހުބުގައި ވައުދުވީ އެ ފަރާތްތަކަށް އެމަނިކުފާނުގެ ސަރުކާރެއްގައި ހިންގޭ އެންމެ ފުރަތަމަ ސޯޝަލް ހައުސިން އެއްގެ ތެރެއިން އެ ފުލެޓުތައް ހަވާލުކޮށްދެއްވާނެ ކަމަށެވެ. ރައީސް ވިދާޅުވީ އެކަން އޮތީ އެގޮތަށް ކަމަށާއި މި ފަށާ ހައުސިން މަޝްރޫއުތަކުން ފުލެޓް ދޭއިރު އެކަމަށް ހާއްސަ ކެޓަގަރީއެއް ވެސް އޮންނާނެ ކަމަށެވެ.

ރައީސް ވިދާޅުވީ އެ ފުލެޓުތައް ހޯދުމަށްޓަކައި އެ ފަރާތްތަކަށް އާ ޝަރުތުތަކެއް ނޯންނާނެ ކަމަށާއި ކަނޑައެޅިފައިވާ އަދަދަށް ކެންސަލް ކުރި ފަރާތްތަކަށް ފުލެޓް ދޭނެ ކަމަށެވެ.

ރައީސް ވިދާޅުވީ އަލަތު ކައިވެނި ކެޓަގަރީތަކުގެ އިތުރުން އެހެން ކެޓަގަރީތަކުން ފުލެޓް ލިބިފައިވާ މީހުން މީގެ ތެރޭގައި ހިމެނޭ ކަމަށާއި މި ސަރުކާރުން ހިންގާ ހައުސިން ސްކީމުތަކުގެ ތެރެއިން "ފުލެޓް ލިޔުން ހަވާލުކުރެވި ފުލެޓް ނުދިން ފަރާތްތަކަށް" އޮންނަ ކެޓަގަރީގެ ތެރެއިން އެ ފުލެޓްތައް ލިބޭނެ ކަމަށެވެ.

ސަރުކާރުން އެންމެ ފުރަތަމަ ފަށާނީ ބީއެމްލްގެ ފައިނޭންސްގެ ތެރެއިން ފަށާ 3،000 ހައުސިންގް ޔުނިޓެވެ. އަދި އޭގެ ފަހުން އިންޑިއާގެ ލައިން އޮފް ކްރެޑިޓްގެ ދަށުން ފަށާ 4،000 ހައުސިންގެ ޔުނިޓެވެ. ރައީސް ވިދާޅުވީ މި ސަރުކާރު ނިމޭއިރު 7،500 ހައުސިން ޔުނިޓް އެޅިގެންދާނެ ކަމަށެވެ.