ހުޅުމާލޭ ތިންވަނަ ފިޔަވަހީގެ މަސައްކަތުގެ ދުވެލި ހަލުވިކޮށް މިހާތަނަށް 30 ހެކްޓަރަށްވުރެ ބޮޑު ސަރަހައްދެއް ހިއްކުމުގެ މަސައްކަތް ނިމިފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން ބުނެފިއެވެ.

މިކަމާ ގުޅިގެން އެޗްޑީސީން އެކްސްގައި ހިއްސާކުރި ޕޯސްޓެއްގައި ބުނީ، ހުޅުމާލެ ތިންވަނަ ފިޔަވަހީގެ ބިން ހިއްކުމުގެ މަޝްރޫއު އަވަސްކުރުމަށް ގެނެވުނު ދެ ޑްރެޖަރާއިއެކު ބިން ހިއްކުމުގެ މަސައްކަތް ހަލުވިކަމާއިއެކު ކުރިއަށްދާ ކަމަށެވެ.

އެ ކޯޕަރޭޝަނުން ބުނި ގޮތުގައި، މި މަޝްރޫއުގެ ޖުމްލަ 63 ހެކްޓަރުގެ ތެރެއިން މިހާރު 30 ހެކްޓަރަށްވުރެ ބޮޑު ސަރަހައްދެއްގެ ބިން މިހާރު ހިއްކާ ނިމިފައިވާ ކަމަށް ވަނީ ބުނެފައެވެ. މި މަސައްކަތް މިހާ ބާރު ސްޕީޑުގައި ކުރިއަށް މިދަނީ މިދިޔަ ނޮވެމްބަރު މަހުގެ ތެރޭގައި ހުޅުމާލޭ ތިން ވަނަ ފިޔަވަހި ހިއްކަން ދެ ޑްރެޖަރު ގެނެސް އެ ޑްރެޖަރުތަކުން އެ ސަރަހައްދު ހިއްކަމުން ދާތީއެވެ.

މިދިޔަ އަހަރުގެ ތެރޭގައި މަސައްކަތް ފެށި މި މަޝްރޫއުގެ އަމަލީ މަސައްކަތް ހުއްޓިފައި ދުވަސްކޮޅަކު އޮތް ނަމަވެސް އަލުން މި މަޝްރޫއުގެ އަމަލީ މަސައްކަތް މިވަނީ ފެށި ބާރު ސްޕީޑުގައި ކުރިއަށްދާން ފަށައިފަ އެވެ. ސަރުކާރުން މިހާރުވެސް ދަނީ މާލޭ ސަރަހައްދުގެ ބޯހިޔާވަހިކަމަށް ދިމާވެފައިވާ މައްސަލަ ހައްލުކުރުމުގެ ގޮތުން ރަސްމާލެ ހިއްކުމުގެ މަސައްކަތްވެސް ކުރަމުންނެވެ.

މީގެ އިތުރުން ގުޅީފަޅު، ގިރާވަރުފަޅު އަދި އުތުރު ތިލަފަޅު ހިއްކުމުގެ މަސްއްކަތްވެސް މި ސަރުކާރުން އަންނަނީ ކުރަމުންނެވެ. މިކަމާ ގުޅިގެން ރައީސް ޑރ. މުއިއްޒު މީގެ ކުރިން ވިދާޅުވީ އަލަށް ގެނެވުނު ޑްރެޖަރުތަކާއެކު މި މަހުގެ ނިޔަލަށް ހުޅުމާލޭ ތިންވަނަ ފިޔަވަހި ހިއްކުމުގެ މަސައްކަތް އެއްކޮށް ނިންމާލެވޭނެ ކަމަށެވެ.