ފަގީރުންގެ ދަފުތަރުގައި ތިބި މީހުންނަށް ޚާއްސަކޮށް، "ޒަކާތު ބެނެފިޝަރީ ކާޑު"ގެ ނަމުގައި ކާޑެއް އަންނަ އަހަރު އިފްތިތާހުކުރުމަށް މަސައްކަތް ކުރަމުންދާ ކަމަށް، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ހާމަކުރައްވައިފިއެވެ.
ޕީއެސްއެމް ނިއުސްގެ 'ރާއްޖެ މިއަދު' ޕްރޮގްރާމްގައި ވާހަކަ ދައްކަވަމުން ޝަހީމް ވިދާޅުވީ، ފަގީރުންނަށް ހާއްސަކޮށް ދޫކުރާ މި ކާޑު ދޫކުރުމަށް ހަމަޖެހިފައިވަނީ ބޭންކް އޮފް މޯލްޑިވްސް (ބީއެމްއެލް)އާއި ޒަކާތު ހައުސް ގުޅިގެން ކަމަށެވެ.
މި ކާޑު އޮންނާނީ ފަގީރުންގެ ދަފްތަރުގައި ރަޖިސްޓްރީވެފައިވާ ފަގީރުންގެ އަތުގައި ކަމަށް މިނިސްޓަރު ޝަހީމް ވިދާޅުވިއެވެ. އަދި ކޮންމެ ފަގީރަކަށް މަހަކު ކަނޑައަޅާފައިވާ ފައިސާގެ އަދަދަށް އެ ކާޑު ބޭނުންކުރެވޭ ފިހާރައަކަށް ގޮސް ކާޑު ދައްކާލުމުން، ކާޑުގައިވާ ފައިސާގެ އަދަދުން އެ ފަގީރަކަށް ކާބޯތަކެތި ލިބޭނެކަމަށް ވިދާޅުވިއެވެ.
"އެހެންވީމާ އޭނާއަށް ލިބިދޭންޖެހޭ އެހީ، ޒަކާތު ހައުސްއިން ކަނޑައަޅާފައިވާ އެހީ، ކޮންމެ އަހަރަކުވެސް އެ ކާޑުން އޭނާއަށް ޕޭ ކުރެވޭނެ،" މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މި ކާޑު އިފްތިތާހުކުރުމުގެ މަގުސަދަކީ ފަގީރުން އެކި އިދާރާތަކަށް ހިނގަންޖެހޭ ހިނގުން މަދުކޮށް، އެ މީހުންނަށް ފަސޭހަކޮށްދިނުން ކަމަށެވެ. އަދި މި ކާޑުން ފަގީރުންގެ ދަފުތަރުގައި ހިމެނޭ ފަރާތްތަކަށް ހިދުމަތް ދިނުމުގެ ނިޒާމު ޒަމާނާ އެއްގޮތަށް ތަރައްގީކޮށް، ފަސޭހަވާނެ ކަމަށާއި މި ކާޑުން އެއީ ފަގީރުންގެ ދަފުތަރުގައި ހިމެނޭ މީހެއްކަން ދެނެގަނެވޭ ކަމަށްވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މި ކާޑު އަންނަ ޖެނުއަރީ މަހު އިފްތިތާހު ކުރުމުގެ މަސައްކަތްތައް ކުރަމުންދާކަމަށެވެ.
