ދާދި ފަހުން ލަންކާއަށް ކުރިމަތިވި ތޫފާން "ދީތުވާ" ގެ ސަބަބުން ލިބުނު ބޮޑެތި ގެއްލުންތަކުން އަރައިގަތުމަށް ބޭރުގެ އެހީގެ ގޮތުގައި މިހާތަނަށް 6.5 މިލިއަން ޑޮލަރު ލިބިފައިވާކަމަށް އެ ގައުމުގެ ސަރުކާރުން ހާމަކޮށްފައިވާއިރު، މި އެހީގެ ތެރެއިން އެންމެ ބޮޑު އެހީ ދިނީ ދިވެހިރާއްޖެއިންނެވެ. ރާއްޖެއިން ޖުމްލަ 2.4 މިލިއަން ޑޮލަރުގެ އެހީ ލަންކާއަށް ފޯރުކޮށްދީފައިވާކަން ވަނީ ހާމަވެފައެވެ.
ތޫފާން ދީތުވާގައި 600 އަށް ވުރެ ގިނަ މީހުން މަރުވެފައިވާއިރު، 200 އާ ގާތްކުރާ އަދަދެއްގެ މީހުން ގެއްލިގެން ހޯދަމުން ދެއެވެ. މީގެ އިތުރުން އެތައް ލައްކަ ބަޔަކު ވަނީ ހާލުގައި ޖެހި، ގޭދޮރު ގެއްލިފައެވެ. ލަންކާގެ ތާރީހުގައި، 2004 ވަނަ އަހަރުގެ ސުނާމީގެ ފަހުން އެ ގައުމަށް ކުރިމަތިވި އެންމެ ގެއްލުން ބޮޑު ކާރިސާ ކަމަށް މިއީ ވެގެން ގޮސްފައިވާ ކަމަށް އެ ގައުމުގެ ކަމާބެހޭ ފަރާތްތަކުން ބުނެއެވެ.
ލަންކާގެ ރައްޔިތުންނަށް އެހީވުމުގެ ގޮތުން ދިވެހި ސަރުކާރުން ވަނީ 50,000 ޑޮލަރާއި 25,000 މަސްދަޅު ކޭސް (އެއީ 1.2 މިލިއަން މަސްދަޅު) އެ ގައުމުގެ ސަރުކާރާ އިއްޔެ ރަސްމީކޮށް ހަވާލުކޮށްފައެވެ. މީގެ އިތުރުން، ރާއްޖޭގެ ގިނަ މީޑިއާތަކާ ގުޅިގެން ބޭއްވި ޓެލެތޯނުން ލިބުނު 800,352 ޑޮލަރު (12.3 މިލިއަން ރުފިޔާ) ވެސް ވަނީ ލަންކާ ސަރުކާރާ ހަވާލުކޮށްފައެވެ. މީގެ އިތުރުން ވެސް އެކިއެކި އަމިއްލަ ފަރާތްތަކުންނާއި އަމިއްލަ ކުންފުނިތަކުން ވަނީ ބޮޑެތި އެހީތަކެއް ދީފަ އެވެ.
ލަންކާ ސަރުކާރުން ލަފާކުރާ ގޮތުގައި ތޫފާނުގެ ސަބަބުން ލިބުނު ގެއްލުންތަކުން އަރައިގަތުމަށް ޖުމްލަ ހަތް ބިލިއަން ޑޮލަރު ބޭނުންވާނެއެވެ. މިހާތަނަށް ލިބިފައިވާ 6.5 މިލިއަން ޑޮލަރަކީ ބޭރުގެ ގައުމުތަކާއި ބައިނަލްއަގްވާމީ އެޖެންސީތަކުން ލިބުނު އެހީއެވެ. މި އެހީގެ ތެރެއިން އެންމެ ބޮޑު ބަޔެއް ރާއްޖެއިން ދީފައިވުމުން، ދެ ގައުމުގެ ދެމެދުގައިވާ ގާތް ގުޅުން ހާމަކޮށްދެއެވެ.
