ސްރީ ލަންކާއަށް އެރި ތޫފާން "ދީތުވާ" އާ ގުޅިހެން އެގައުމުގެ އެތަށް ހާސް ރައްޔިތުންނެއް ހާލުގައި ޖެހިފައިވުމާއި އެ ގައުމަށް ލިބިފައިވާ ބޮޑެތި ގެއްލުންތަކުން އަރައިގަތުމަށްޓަކައި އެހީވުމުގެ ގޮތުން ދިވެހިރާއްޖޭގައި ކުރިއަށް ގެންދިޔަ "ސިލޯނާއެކު ދިވެހީން" ޓެލެތޯނަށް ލިބުނު 800،352 އެމެރިކާ ޑޮލަރު ނުވަތަ 245 މިލިއަން ލަންކާ ރުޕީސް، އެ ގައުމުގެ ސަރުކާރާ ރަސްމީކޮށް ހަވާލުކޮށްފި އެވެ.

ޕަބްލިކް ސަރވިސް މީޑިއާ (ޕީއެސްއެމް) އިން އިސްނަގައިގެން، ރާއްޖޭގެ 30 އަށް ވުރެ ގިނަ މީޑިއާތަކެއް ގުޅިގެން 29 ގަޑިއިރަށް ކުރިއަށް ގެންދިޔަ މި ޓެލެތޯން، ފެށުނީ ނޮވެމްބަރު 30 ވަނަ ދުވަހު އެވެ. މި ޓެލެތޯންގައި ބައިވެރިވުމުގެ ފުރުސަތު ރާއްޖޭގެ ހުރިހާ ރައްޔިތުންނާއި، ޖަމިއްޔާ ޖަމާއަތްތަކާއި، ކްލަބްތަކާއި، އޮފީސްތައް ފަދަ ހުރިހާ ފަރާތްތަކަށް ހުޅުވާލި އެވެ.

ކުންފުނިތަކާއި ވުޒާރާތަކާއި މުވައްސަސާތަކާއި ސަރުކާރުގެ ކުންފުނިތަކުންނާއި އަމިއްލަ ފަރާތްތަކުން ވަނީ މި ޓެލެތޯނަށް ބޮޑު އެހީތެރިކަމެއް ފޯރުކޮށްދީފަ އެވެ. އެގޮތުން އެންމެ ބޮޑު އެހީތެރިކަމެއް ފޯރުކޮށްދިނީ ދިވެހި ފުލުހުންނާއި ސިފައިންނެވެ. ފުލުހުންގެ ފަރާތުން 2.4 މިލިއަން ރުފިޔާ ހަދިޔާ ކުރިއިރު، ސިފައިންގެ ފަރާތުން އެއް މިލިއަން ރުފިޔާ ހަދިޔާ ކުރި އެވެ. ފައިސާ އެއްކުރުމަށް މާލެ އާއި ހުޅުމާލޭގައި ފަންޑް ފޮށިވެސް ބެހެއްޓުނެވެ.

ޓެލެތޯނުން ލިބުނު ފައިސާ ޕީއެސްއެމް އިން ހަވާލު ކުރީ ދިވެހިރާއްޖޭގެ ހާރިޖީ ވުޒާރާއާ އެވެ. މިއަދު އެ ފައިސާ ރަސްމީކޮށް ލަންކާ ސަރުކާރާ ހަވާލުކޮށްދެއްވީ ލަންކާގައި ހުންނަ ރާއްޖޭގެ ސަފީރު މަސްއޫދު އިމާދެވެ.

_{ރާއްޖޭގެ ސަރުކާރުން 25،000 ކޭސް މަސްދަޅު ލަންކާއާ ހަވާލުކުރުން.}

ދިވެހި ސަރުކާރުން ހަދިޔާ ކުރި 25,000 ކޭސް މަސްދަޅުވެސް މިއަދު ވަނީ ލަންކާ ސަރުކާރާ ހަވާލުކޮށްފަ އެވެ. މީގެ އިތުރުން ދިވެހި ސަރުކާރުން ވަނީ 50,000 އެމެރިކާ ޑޮލަރުވެސް މީގެ ކުރިން ލަންކާ ސަރުކާރާ ހަވާލުކޮށްފަ އެވެ. ރާއްޖޭގެ އެކި ކުންފުނިތަކުންނާއި އަމިއްލަ ގޮތުން ލަންކާއަށް ބޮޑު އެހީތެރިކަމެއް ފޯރުކޮށްދީފައިވެ އެވެ. އޭގެ ތެރޭގައި ސަން ސިޔާމް ގްރޫޕާއި ވިލާ ގްރޫޕުގެ ފަރާތުން ދިން ބޮޑު އެހީ ފާހަގަކޮށްލެވެ އެވެ.

ލަންކާ އަށް އެރި ތޫފާން "ދީތުވާ" ގެ ސަބަބުން މަރުވި މީހުންގެ އަދަދު 607 އަށް އަރާފައިވާއިރު، ވީނުވީއެއް ނޭނގި ގެއްލިގެން ހޯދަމުން އަންނަ މީހުންގެ އަދަދު ވަނީ 200 އަށް ވުރެ މައްޗަށް އަރާފަ އެވެ. މި ހާލަތުގައި ދިވެހި ރައްޔިތުންނާއި ސަރުކާރުން ވެދެއްވި އެހީތެރިކަމަށް ލަންކާގެ ރައީސް ވަނީ ރާއްޖެ އަށާއި ރައީސް ޑރ. މުޢިއްޒު އަށް ޝުކުރު އަދާކޮށްފަ އެވެ.