ގަވާއިދާ ހިލާފަށް މަގުމަތީގައި ޕާކުކޮށްފައި ހުންނަ އުޅަނދުތައް ޓޯ ކުރުމަށް ހާއްސަ އުޅަނދެއް ފުލުހުން ބޭނުންކުރަން ފަށައިފި އެވެ.
ފުލުހުން ވަނީ މި އުޅަނދުގެ ފޮޓޯ ސޯޝަލް މީޑިއާގައި ހިއްސާކޮށްފަ އެވެ. މީގެ ކުރިން ގަވާއިދާ ހިލާފަށް ޕާކުކޮށްފައި ހުންނަ އުޅަނދުތައް ޓޯ ކުރަން ފުލުހުން ބޭނުންކުރީ ފޯކްލިފްޓެކެވެ. ފޯކްލިފްޓް ބޭނުންކުރުމުގެ ސަބަބުން އުޅަނދުތައް ޓޯ ކުރުމުގައި ބައެއް ފަހަރު އުޅަނދުތައް ގެއްލުން ލިބެ އެވެ.
މިކަމާ ގުޅިގެން ފުލުހުން ސޯޝަލް މީޑިއާގައި ކޮށްފައިވާ ޕޯސްޓެއްގައި ބުނީ އިއްޔެ މި އުޅަނދު ބޭނުންކުރަން ފަށާފައިވާ ކަމަށާއި، ހަތަރު ފުރޮޅުލީ އުޅަނދުތައް ޓޯ ކުރުމަށް އެކަމަށް ހާއްސަ އުޅަނދެއް ބޭނުންކުރަން ފެށުމުން، އެ މަސައްކަތަށް ބޮޑެތި ފަސޭހަތަކެއް ލިބިގެންދާނެ ކަމަށެވެ.
މާލެ އާއި ހުޅުމާލޭގެ މަގުތަކުގައި އާންމު ދަތުރުފަތުރަށް އުނދަގޫވާ ގޮތަށް ގަވާއިދާ ހިލާފަށް ޕާކުކޮށްފައިވާ އުޅަނދުތައް ނެގުމުގެ މަސައްކަތް ފުލުހުން އަންނަނީ ހުއްޓުމެއްނެތި ކުރަމުންނެވެ. އެގޮތުން ކަފިހި ހުރަހުގައި އަދި ގޯޅިކަންމަތީގައި ޕާކު ކޮށްފައިވާ އުޅަނދުތައް މާލޭގެ މަގުތަކުން ނެގުމުގެ މަސައްކަތް އިއްޔެ ވަނީ ފަށައިފަ އެވެ.
ފުލުހުން އަންނަނީ ޓޯ ކުރާ އުޅަނދުތަކުގެ ތަފްސީލުތައް ހާމަކުރަމުންނެވެ. އެ ތަފްސީލުތަކުން ހާމަވާ ގޮތުގައި،މާލޭ ސަރަހައްދުން އުޅަނދު ޓޯ ކުރި މިންވަރު ވަނީ އިތުރުވެފަ އެވެ.
