ކައުންސިލް ބަޖެޓުން ހަރަދުކޮށްގެން ގއ. ދެއްވަދޫގައި ވޯޓާ ޕާކެއް ގާއިމްކޮށްފި އެވެ.

މި ވޯޓާ ޕާކަކީ އެ ރަށުގައި ދިރިއުޅޭ ޒުވާނުންނާއި ކުޑަކުދިން ކުޅުވަރު ކުޅޭނެ ފުރުސަތުތައް ފަހިކޮށްދިނުމުގެ މަގްސަދުގައި ގާއިމްކުރި ޕާކެކެވެ. އަދި އެ ފަރާތްތަކަށް އާއިލާއާއެކު މަޖާކޮށްލެވޭނެ ތަނެއް ހެދުމުގެ ގޮތުންނާއި، ހިތްފަސޭހަ މާހައުލެއްގައި ވަގުތު ހޭދަކޮށްލެވޭނެ ތަނެއް އުފެއްދުން ކަމަށް ކައުންސިލުން މައުލޫމާތު ދެއެވެ.

_{ދެއްވަދޫގައި ގާއިމްކޮށްފައިވާ ވޯޓާ ޕާކު---ފޮޓޯ: ދެއްވަދޫ ކައުންސިލް}

ދެއްވަދޫ ކައުންސިލްގެ ނައިބު ރައީސް އަހްމަދު ފަޒްހާދު ވިދާޅުވީ މި މަޝްރޫއުގެ ދަށުން އެ ސަރަހައްދުގައި ބާބަކިއު އޭރިއާ އަކާއެކު ޕަބްލިކް ބީޗެއްގައި ހުންނަންޖެހޭ ހުރިހާ ކަމެއް ކުރިއަށް އޮތްތަނުގައި ގާއިމްކުރެވޭނެ ކަމަށެވެ. ފަޒުހާދު ވިދާޅުވީ މި ވޯޓާ ޕާކުގެ މަސައްކަތް ނިންމަން ހޭދަވީ މަހެއްހާ ދުވަސް ކަމަށެވެ.

ދެއްވަދޫ އަކީ ޒަމާނުއްސުރެ އެކުވެރި، ބަދަހި ބައެއް ދިރިއުޅޭ ރަށެކެވެ. ރަށުގެ ތަރައްގީއަށްޓަކައި ވަކި ކުލައަކަށް ބެލުމެއްނެތި އެއް މިސްރާބަކަށް އަމާޒު ހިފާ ރައްޔިތުން ދިރިއުޅޭ ރަށެކެވެ. އަދި ސާފްތާހިރުކަމަށް ވެސް ލޯބިކުރާ، އެއްބައިވަންތަކަމުގެ ލާމަސީލު ރައްޔިތުން ދިރިއުޅޭ ރަށެކެވެ.

ޕީއެސްއެމް އިން މިހާރު ކުރިއަށް ގެންދާ ޗާލު ދިވެހިރާއްޖެ އެވޯޑުގެ ތިން ކެޓަގަރީއަކަށް ދެއްވަދޫ ވަނީ ނޮމިނޭޓްވެފަ އެވެ. އެ ކެޓަގަރީތަކަކީ؛

- އެންމެ ހިތްގައިމު ގޮނޑުދޮށް

- ސާފުތާހިރު، އެންމެ ތިމާވެއްޓާ ރައްޓެހި ރަށް

- އެންމެ އެކުވެރި މުޖުތަމައު

މި އެވޯޑަށް ކުރިމަތިލުމަށް "ޕީއެސްއެމް އެއާ" އެޕްލިކޭޝަން ޑައުންލޯޑް ކުރައްވަން ޖެހޭނެ އެވެ.