އިންސާނުންނަށް އުނދަގޫވާ ކަންތައްތަކުން މަލާއިކަތް ބޭކަލުންނަށްވެސް އުނދަގޫފުޅުވާ ކަމަށް މިއަދުގެ ހުކުރު ހުތުބާގައި ބުނެފި އެވެ.
މިއަދުގެ ހުކުރު ހުތުބާގައި ބުނެފައިވާ ގޮތުގައި، ދުންފަތަކީ އެތަކެއްގޮތަކުން ހަށިގަނޑަށް ގެއްލުން ހުރި އެއްޗެއްކަން ދިރާސާތަކުން ސާބިތުވެފައިވި ނަމަވެސް ދުންފަތުގެ އިސްތިއުމާލުކުރާ މީހުން އެކަމާ މެދު މާބޮޑު ފަރުވާލެއް ނުބަހައްޓައި އެކަންކުރާ ކަމަށެވެ. އަދި ބުރަ މަސައްކަތުން ހޯދާ ފައިސާ ބޭކާރު ގޮތުގައި ހޭދަކޮށް އަމިއްލަ ހަށިގަނޑަށް ގެއްލުންދޭ ކަމަށް ހުތުބާގައި ވަނީ ބުނެފަ އެވެ.
ދުންފަތުގެ އިސްތިއުމާލުކުރުމުގެ ސަބަބުން ފުއްޕާމެޔަށް ކެންސަރުޖެހި، ހިތާ ގުޅިފައިވާ ނާރުތަަކުގައި ސަރުބީޖަހައި، ލޭ ހިނގުމަށް ދަތިވެ، ހޮޅިތައް ބެދުމަށް މެދުވެރިވެ އަދި ހއެތެރެ ހަށީގެ ގުނަވަންތަކަށް ކެންސަރުޖެހުމަށް މަގުފަހިވާ ކަމެއް ކަމަށް ހުތުބާގައި ވަނީ ބުނެފަ އެވެ. މީގެ އިތުރުން ދުންފަތުގެ އިސްތިއުމާލުކުރުމުގެ ސަބަބުން މާބަނޑު އަންހެނާގެ ބަނޑުގައިވާ ދަރިފުޅު ބައިގެންދިއުމާއި، ވިހެއުމުގެ ކުރިން ދަރިފުޅު މަރުވުންވެސް ހިމެނޭ ކަމަށް ހުތުބާގައި ވަނީ ބުނެފަ އެވެ.
ހުތުބާގައި ބުނެފައިވާ ގޮތުގައި، ދުންފަތުގެ އިސްތިއުމާލުކުރުމުގެ ސަބަބުން ގެއްލުން ލިބެނީ ހަމައެކަނި އެކަން ކުރާ ބަޔަކަށް ނޫންކަމަށް ވަނީ ބުނެފަ އެވެ. މީހުން އެއްވެ އުޅޭ ތަންތާގައި ދުންފަތުގެ އިސްތިއުމާލުކުރުމުގެ ސަބަބުން އެތަނެއްގައި ތިބި ދުންފަތުގެ އިސްތިރުމާލު ނުކުރާ މީހުންނަށްވެސް ބޮޑެތި ގެއްލުންތައް ލިބޭ ކަމުގައި ހުތުބާގައި ވަނީ ބުނެފަ އެވެ. އެގޮތުން ސިނގިރޭޓެއް ބޮއި ނިމެންދެން އެމީހަކާ އެއް މަޖިލީހެއްގައި ހުރި މީހަކަށް ސިނގިރޭޓެއްގެ ދެބައިކުޅަ އެއްބައި ބުއިމުން ލިބޭނެ ގެއްލުން ލިބޭނެ ކަމަށްވެސް ހުތުބާގައި ވަނީ ބުނެފަ އެވެ.
އތެރެ ހައްޓަށް ޖެހޭ ގިނަ ބަލިތަކުގެ އަސްލަކީ ދުންފަތުގެ އިސްތިއުމާލުކުރުން ކަމަށާއި، ދުންފަތުގެ އިސްތިއުމާލުކުރުމުގެ ސަބަބުން އަމިއްލަ ނަފުސު މަޑުމަޑުން މަރާލާ ކަމަށް މިއަދުގެ ހުތުބާގައި ވަނީ ބުނެފަ އެވެ. އަދި އަމިއްލަ ނަފުސު މަރާލުމަކީ ބޮޑުވެގެންވާ ފާފައެއް ކަމަށްވެސް ހުތުބާގައި ވަނީ ފާހަގަކޮށްފަ އެވެ.
