މަސްތުވާ ތަކެތީގެ ނަމުގައި އެމެރިކާ އިން ދުނިޔޭގައިވާ އެންމެ ބޮޑު ތެލުގެ ރިޒާވް ހިމެނޭ ވެނެޒުއެލާ އަށް އަތްގަދަކުރަން ކުރަމުންދާ މަސައްކަތާއި ދެކޮޅަށް ރަޝިއާ އާއި އީރާނާއި ޗައިނާ އަދި އުތުރު ކޮރެއާ އިން ވެނެޒުއެލާ ކޮޅަށް ޖެހުމާއި އެކު، ޕްރެޝަރު ބޮޑުވެފައިވާ ރައީސް ޑޮނަލްޑް ޓްރަމްޕް ވެނެޒުއެލާގެ ރައީސް ނިކޮލަސް މަޑޫރޯ އާއި އެކު ފޯނުން މަޝްވަރާ ކޮށްފިއެވެ.

މިކަން ކަށަވަރު ކޮށްދެއްވަމުން ކަރަކާސް އިން ބުނީ ރައީސް މަޑޫރޯ އާއި ޓްރަމްޕުގެ ކޯލަކީ “ވަރަށް އިޙްތިރާމާއި އެކު ބޭއްވި ބިނާކުރަނިވި” މަޝްވަރާތަކެކެވެ. ނަމަވެސް އިތުރު ތަފްޞީލެއް ނުދެއެވެ.

މަޑޫރޯގެ ސަރުކާރާއި ވޮޝިންގޓަނާއި ދެމެދު ނުތަނަވަސްކަން އޮންނަތާ ދިހަވަރަކަށް އަހަރު ވެއްޖެއެވެ. ވޮޝިންގޓަނުން ކަރަކާސް އާއި އެކު ރަސްމީ ގުޅުން ކަނޑާލީ 2019 ވަނަ އަހަރުގައެވެ. އޭގެފަހުން އެމެރިކާ އިން ވަނީ ކަރަކަސްއަށް އިޤްތިޞާދީ ގޮތުން ވަރަށް ބޮޑަށް ދަތިކުރުމުގެ ފިޔަވަޅުތަކެއް އަޅާފައެވެ. ޚާއްޞަކޮށް ވެނެޒުއެލާގެ ރައްޔިތުންގެ ދައުލަތުގެ ތެޔޮ ކުންފުނި ކަމަށްވާ ޕީޑީވީއެސްއޭއަށް އަމާޒުކޮށެވެ. އެގޮތުން، ސަރުކާރުގެ އެސެޓްތައް ފްރީޒްކޮށް، ސަރުކާރުގެ މިނިސްޓަރުންގެ ދަތުރުފަތުރަށް ދަތިކޮށް އަދި މާލީ ކަންކަމުގައި ވެސް ވެނެޒުއެލާ އަށް އެމެރިކާ އިން ވަނީ ދަތިކޮށްފައެވެ. މިއީ އެމެރިކާގެ ތާރީޚަށް ބަލާއިރު ވެސް ޤައުމަކަށް އަތްގަދަކުރުމަށް ނުވަތަ ޙަމަލާ ދިނުމުގެ ކުރިން އެ ޤައުމަކާއި ދެކޮޅަށް އެމެރިކާއިން އެންމެ ފުރަތަމަ އަޅާ ފިޔަވަޅުތަކެވެ.

އެމެރިކާއިން ވެނެޒުއެލާ އަށް އަރައިގަންނަން އުޅޭތީވެ ރައީސް މަޑޫރޯ ވަނީ ރަޝިޔާގެ އެހީތެރިކަމަށް ވެސް މީގެ ކުރިން އެދިފައެވެ.

އެއާއި އެކު އީރާނުން އާދަޔާއި ޚިލާފަށް ގިނައިން ވެނެޒުއެލާ އަށް ދަތުރުތައް ކޮށްފައިވާ ކަމަށް ނުރަސްމީ މަސްދަރަކުން ބުނެފައި ވެއެވެ. ނަމަވެސް ހަތިޔާރު ގެންދިޔަ ކަމެއް ކަށަވަރެއް ނުވެއެވެ.