އެއް ލީޓަރާއި އެއް ލީޓަރަށް ވުރެ ކުދި 500 މިލިލީޓަރާ ދެމެދު ޕްލާސްޓިކް ފުޅީގައި ބަންދުކޮށްފައި ހުންނަ ފެން ރާއްޖެ އެތެރެ ކުރުން މަނާވާ ތާރީހު 2028 ވަނަ އަހަރަށް ފަސްކޮފި އެވެ.

ދިވެހިރާއްޖޭގެ އެކްސްޕޯޓް އިމްޕޯޓުގެ ގާނޫނުގެ ދަށުން ސިންގަލް ޔޫސް ޕްލާސްޓިކުގެ ބާވަތްތައް އެކި މަރުހަލާތަކަށް ބަހާލައިގެން ކަނޑައެޅުމުގެ އިހުތިޔާރު ރައީސުލްޖުމްހޫރިއްޔާ އަށް ލިބިގެންވެ އެވެ. އެގޮތުން އޭގައިވާ 14 ބާވަތުގެ ތެރެއިން 13 ބާވަތެއް މިހާރު މަނާކޮށްފައިވާއިރު މަނާނުވެ އޮތީ ޕްލާސްޓިކް ފުޅީގެ ބާވަތެވެ.

އެއްފަހަރު ބޭނުންކޮށްފައި އުކާލާ ޕްލާސްޓިކުގެ ބާވަތްތައް ކަނޑައަޅާ ރާއްޖޭގައި އުފެއްދުމާއި ރާއްޖެއަށް މަނާކުރުމުގެ ގާނޫނެއް ފާސްކުރީ ނިމިދިޔަ ސަރުކާރުންނެވެ. އޭގައިވާ 14 ބާވަތުގެ ތެރެއިން މިއަދާ ހަމައަށް މަނާ ނުވެ އޮތީ ޕްލާސްޓިކް ފުޅީގެ ބާވަތެވެ. އެ ބާވަތުގެ ތަކެތި މަނާކުރުން ކުރީގައި ކަނޑައެޅި ތާރީހަކީ އިއްޔެ އެވެ. އަދި ބާޒާރަށް ނެރުން މަނާވާ ތާރީހެއްގެ ގޮތުގައި ކަނޑައެޅީ 2026 ވަނަ އަހަރުގެ މާޗު މަހެވެ. ނަމަވެސް ރައީސުލްޖުމްހޫރިއްޔާ އަށް ލިބިދޭ އިހުތިޔާރުގެ ދަށުން އެ ތާރީހުތައް ވަނީ ބަދަލުކޮށްފަ އެވެ.

އެގޮތުން އެއް ލީޓަރާއި އެއް ލީޓަރަށް ވުރެ ކުދި 500 މިލިލީޓަރާ ދެމެދު ޕްލާސްޓިކް ފުޅީގައި ބަންދުކޮށްފައި ހުންނަ ފެން ރާއްޖެ އެތެރެކުރުމާއި ރާއްޖޭގައި އުފެއްދުން 2027 ވަނަ އަހަރުގެ ޑިސެމްބަރު 1 ވަނަ ދުވަހުން ފެށިގެން މަނާވާނެ އެވެ. އަދި އެ ބާވަތްތައް ރާއްޖޭގެ ބާޒާރަށް ނެރުން 2028 ވަނަ އަހަރުގެ ޖޫން 1 ވަނަ ދުވަހުން ފެށިގެން މަނާވާނެ އެވެ.

ރާއްޖެއަށް އެތެރެކުރުން މަނާވާ ސިންގަލް ޔޫސް ޕްލާސްޓިކުގެ ބާވަތްތަކުގެ ތެރެއިން މީގެ ކުރިން މަނާ ކުރެވުނު ބާވަތްތަށް؛

1. 250 މިލިލީޓަރަށް ވުރެ ކުޑަ. އެއްފަހަރު ބޭޏުންކުރެވޭ، ދިޔާތަކެތި ބޯން ބޭނުންކުރާ ޕްލާސްޓިކް ތަށި
2. ޕްލާސްޓިކް ދަނޑިކޮޅު ލައިފައިވާ ކަފަބުރު
3. 50 މިލިލީޓަރާއި 50 މިލިލީޓަރަށް ވުރެ ކުދި ޕްލާސްޓިކް ފުޅީގައި ބަންދުކޮށްފައި ހުންނަ ޝޭމްޕޫއާއި، ސައިބޯންޏާއި، ކޮންޑިޝަނައާއި، ލޯޝަންފުޅި
4. 50 މިލިލީޓަރުން ފެށިގެން 200 މިލިލީޓަރާ ހަމައަށް ހިމެނޭ، ޕްލާސްޓިކް ފުޅީގައި ބަންދުކޮށްފައި ހުންނަ ޝޭމްޕޫއާއި، ސައިބޯންޏާއި، ކޮންޑިޝަނައާއި ލޯޝަންފުޅި
5. ބާޒާރުކުރަން ބޭނުންކުރާ 50 މައިކްރޯންއަށް ވުރެ ތުނި ޕްލާސްޓިކް ކޮތަޅު
6. ޕްލާސްޓިކް ޕެކެޓުގައި ބަންދުކޮށްފައި ހުންނަ ސުޕާރި
7. ޕްލާސްޓިކް ޕެކެޓު ފިޔަވައި އެހެނިހެން ޕްލާސްޓިކުގައި ބަންދުކޮށްފައި ހުންނަ ސުޕާރި
8. ދިޔާތަކެތި ބުއިމާއި ބޭނުންކުރާ، އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކުން ހަދާފައި ހުންނަ ޕްލާސްޓިކް ހޮޅި
9. ޕްލާސްޓިކުން ހަދާފައި ހުންނަ ކާތަށްޓާއި، ސަމްސަލާއި، ވަޅިއާއި، އުލާއި، ދިޔާތަކެތި ގިރަސް ބޭނުންކުރާ ޕްލާސްޓިކް ދަނޑިކޮޅު
10. ކާބޯތަކެތި ބަންދުކުރާ ފުޅިމަދު ފޮށި
11. ބާޒާރުކުރަން ބޭޏުންކުރާ 30×30 ސެމްޓިމީޓަރަށް ވުރެ ކުދި ޕްލާސްޓިކް ކޮތަޅު
12. 500 މިލިލީޓަރަށް ވުރެ ކުދި، ޕްލާސްޓިކް ފުޅީގައި ބަންދުކޮށްފައި ހުންނަ ފެން
13. 500 މިލިލީޓަރަށް ވުރެ ކުދި، ޕްލާސްޓިކް ފުޅީގައި ބަންދުކޮށްފައި ހުންނަ ތައްޔާރީ ބުއިންތައް