ތޫފާން ދިތުވާގައި ލަންކާ ރޮއްވައިލުމަށްފަހު އެ ތޫފާން މިހާރު އެ ޤައުމާއި ދުރަށް ދާއިރު، ލަންކާ އަށް ދެވަނަ ރާޅެއް އަންނަން ކައިރިވެއްޖެ ކަމަށް ސެޓްލައިޓް ފޮޓޯތަކުން ދައްކައިފިއެވެ.
ތޫފާން ދިތުވާގައި ލަންކާ އިން 355 މީހުން މަރުވެ 366 މީހުން ވަނީ ގެއްލިފައި ކަމަށް ބައެއް މަސްދަރުތަކުން ބުނެއެވެ.
މޫސުމާއި ބެހޭ އިދާރާތަކުން ލަފާ ކުރަނީ މި ހަފްތާއިން ފެށިގެން އަލުން ނުރައްކާތަކެއް ކުރިމަތިވާނެ ކަމަށެވެ.
ސެޓްލައިޓް ފޮޓޯތަކުން ފެންނަ ގޮތުގައި މިހާރު ލަންކާގެ ޙާލަތު ރަނގަޅެވެ. ހަމަ އެހެންމެ ފިނިހޫނުމިން ވެސް ހުރީ ގާތްގަނޑަކަށް 29-30 ޑިގްރީ ސެލްސިއަސް އަށެވެ. މިއަދާއި މިމަހުގެ ތިންވަނަ ދުވަހާއި ހަމަޔަށް ލަންކާގެ ރައްޔިތުންނަށް އިތުރު ނުރައްކަލެއް ނެތެވެ.
ނަމަވެސް މި މަހުގެ ފަސްވަނަ ދުވަހުން ފެށިގެން ކެންޑީ، ބަދުއްލާ، އަދި ރަތުނާޕޫރާ ފަދަ ސަރަޙައްދުތަކަށް ބޯކޮށް ގުގުރުމާއި އެކު ވިއްސާރަވެ ކޯރުތައް ބަންޑުން ވުމަކީ އެކަށީގެންވާ ކަމެކެވެ. ކޮލޮމްބޯ އަށް ވެސް ގުގުރުމާއި އެކު ބޯކޮށް ވާރޭ ވެހޭނެއެވެ.
