ގަވާއިދާއި ހިލާފަށް އިމިގްރޭޝަންގެ އެއްވެސް އޮފިސަރަކަށް އަމުރު ނުކުރެވޭނެ ކަމަށް ކުރީގެ ކޮންޓްރޯލާ އޮފް އިމިގްރޭޝަން މުހައްމަދު ޝަމްއާން ވަޙީދު ބުނި ކަމަށް އިއްޔެ ކްރިމިނަލް ކޯޓުގައި އޮތް ޝަރީއަތުގައި ހެކިބަސް ދެއްވަމުން އިމިގްރޭޝަންގެ އިންޓެލިޖެންސް ޑިޕާޓްމެންޓްގެ ހެޑް މުހައްމަދު ޝިފާން ވިދާޅުވެއްޖެ އެވެ. މިއީ މި އަހަރުގެ މާޗް މަހު އިމިގްރޭޝަންގެ ރިސްކް ޑިވިޝަނުން ބަންދުކުރި ބިދޭސީއަކު ދޫކޮށްލި މައްސަލައިގައި ޝަމްއާނަށް ކުރާ ބޮޑެތި ތުހުމަތުތަކާއި ގުޅޭ މައްސަލައެވެ.
މުހައްމަދު ޝިފާން ހެކިބަސް ދިން ގޮތުގައި ޝަމްއާނުގެ އިރުޝާދުގެ ދަށުން އެ އޮޕަރޭޝަން ހިންގި ނަމަވެސް ކުރީގެ ކޮންޓްރޯލަރުގެ ހައިސިއްޔަތުން ގަވާއިދާއި ހިލާފު ކަމެއް ކުރުމަށް އެއްވެސް އިރުޝާދެއް ޝަމްއާން ދީފައެއް ނުވެއެވެ.
އިއްޔެ އަޑުއެހުމުގައި ބަންދުގައި ތިބި ބިދޭސީންނާ ގުޅޭގޮތުން ދިން ލަފާ ސާފުކޮށްދިނުމަށް އެދުމުން ޝިފާން ވިދާޅުވީ އެމީހުންގެ (ބިދޭސީންގެ) އަތުގައި ސައްހަ ވިސާ އެއް އޮތް ކަމަށާއި، އެހެން ކުށެއް ކޮށްގެން ނޫނީ ގާނޫނީ ގޮތުން ބަންދުގައި އެ މީހުން ނުބެހެއްޓޭނެ ކަމަށެވެ.
ދައުލަތުން ތުހުމަތުކުރާ ގޮތުގައި ބަންދުކޮށްފައިވާ ބިދޭސީ މީހާ ދޫކުރުމަށް އަމުރުކުރީ ޝަމްޢާނެވެ. އަދި 500،000 ރުފިޔާ ބިދޭސީ މީހާގެ އަތުން ނެގުމަށް ޝަމްއާން އަމުރުކުރި ކަމަށާއި އެ ފައިސާ ނެންގެވުމަށް ފަހު އޭގެތެރެއިން 400،000 ރުފިޔާ ޝަމްއާނުގެ އަތުގައި ބެހެއްޓި ކަމަށެވެ. ޕީޖީން ބުނާ ގޮތުގައި ޝަމްއާން ވަނީ އެ ފައިސާގެ ބައެއް ބޭންކް އޮފް މޯލްޑިވްސްގެ ދެ ސްޓޫޑެންޓް ލޯނަކަށް ދައްކާފައެވެ.
ޝަމްއާން ގެ ވަކީލު ނޫރުއްސަލާމް އަބޫބަކުރު މީގެ ކުރިން ވިދާޅުވެފައި ވަނީ ޝަމްއާންގެ މައްޗަށް ބަލަމުން މިދާ މައްސަލައިގައި ނުފޫޒު ފޯރުވަންޖެހޭ ހެއްކެއް ނުހުންނާނެ ކަމަށާއި އަދި ނުފޫޒު ފޯރުވައިގެން ބަދަލު ކުރަންޖެހޭ ހެއްކެއް ވެސް ނުހުންނާނެ ކަމަށެވެ.
