ކުރީގެ ރައީސުންނަށް ދިވެހި ދައުލަތުގެ ބަޖެޓުން ކޮންމެ މަހަކު ދޭ އޮފީސް ހިންގުމުގެ ހަރަދު ކަމަށްވާ 175،000 ދިވެހި ރުފިޔާގެ އިނާޔަތް ކަނޑާލުމަށް ރައްޔިތުންގެ މަޖިލީހުން ފާސްކޮށްފި އެވެ. މި ބިލު ފާސްކޮށްފައިވަނީ 68 މެންބަރުންގެ އަގުލަބިއްޔަތާއެކުގަ އެވެ. މި ބިލު މަޖިލީހަށް ހުށަހެޅީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.
މި ބިލު ފާސްވުމާއެކު ކުރީގެ ރައީސުން ދައުލަތުގެ އިތުރު މަގާމެއް އަދާކުރައްވާ ނަމަ ކުރީގެ ރައީސުންނަށް ދޭ އެއްވެސް އިނާޔަތެއް ދެން ނުލިބޭނެ އެވެ. ކުރީގެ ރައީސަކު ރާއްޖެ އިން ބޭރުގައި ދިރިއުޅުއްވާ ނަމަ ހިމާޔަތާއި ރައްކާތެރިކަން ލާޒިމް ނުވާނެ ކަމަށާއި، ނަމަވެސް އަނބުރާ ރާއްޖެ އައުމުން ހިމާޔަތާއި ރައްކާތެރިކަން ލިބޭނެ ކަމަށް އެ ބިލުގައި ބަޔާންކޮށްފައިވެ އެވެ.
ރައީސުންނަށް އިނާޔަތް ދިނުމުގެ ގާނޫނުގައި ވާގޮތުން އެއްދައުރު ކޮށްފިނަމަ 50،000 ރުފިޔާ މަހަކު ދޭންޖެހޭނެ އެވެ. އަދި އެއަށްވުރެ ގިނަ ދައުރު ކުރައްވައިފި ނަމަ 75،000 ރުފިޔާ މަހަކު ދޭންވާނެ އެވެ. މީގެ އިތުރުން ކުރީގެ ރައީސަކު ދިރިއުޅުއްވާ ގެކޮޅަށް ދައުލަތުގރ ބަޖެޓުން މަހަކު 50،000 ރުފިޔާ ހަމަޖައްސައިދޭން ވާނެ އެވެ. އެހެން ކަމުން މުޅި ޖުމްލަ މަހަކު ކުރީގެ ރައީސުންނަށް ލިބޭނީ 100،000 ރުފިޔާ އެވެ. ދެ ދައުރު ކުރެއްވި ރައީސަކު އަދި ނެތެވެ.
Advertisement
ރިޔާސީ ދައުރެއް ފުރިހަމަ ކުރެއްވި ކުރީގެ ނައިބު ރައީސުންނަށް އިނާޔަތެއް ކަނޑައެޅުމަށް މިއަދު ފާސްކުރި ބިލުގައި ހިމަނާފައިވެ އެވެ. އެގޮތުން ނައިބު ރައީސްކަން ކޮށްފައިތިބި ބޭފުޅުންނަށް މަހަކު 30،000 ރުފިޔާ ހަމަޖައްސައި ބޭސްފަރުވާގެ ކަންކަން ދައުލަތުން ހަމަޖައްސަން ވާނެ އެވެ. ނައިބު ރައީސުންގެ ތެރޭގައި މި ޝަރުތު ފުރިހަމަވާނެ ހަމައެކަނި ރައީސަކީ ނިމިދިޔަ ދައުރުގައި ހުންނެވި ފައިސަލް ނަސީމެވެ. ރާއްޖޭގެ ނައިބު ރައީސަކު ފަސް އަހަރުގެ ދައުރެއް ފުރިހަމަ ކުރެއްވީ ހަމައެކަނި ފައިސަލް ނަސީމެވެ. އެހެން ކަމުން އެކަމަށްޓަކައި މިލިއަނެއްހާ ރުފިޔާ ވަނީ ކަނޑައަޅާފަ އެވެ.
މި ބަދަލާއެކު ކުރީގެ ރައީސުންނަށް ހާއްސަކުރި އަދަދު 19.7 މިލިއަން ރުފިޔާއިން 10.2 މިލިއަން ރުފިޔާ އަށް ކުޑަވެ 9.5 މިލިއަން ރުފިޔާ ބަޖެޓުން ސަލާމަތްވެގެންދާނެ އެވެ.
ދައުލަތުގެ ހަރަދު ކުޑަކުރުމުގެ ގޮތުން ކުރީގެ ރައީސުންނަށް ދޭ އިނާޔަތް ކުޑަކުރައްވަން ނިންމާފައިވާ ކަމަށް ރައީސުލްޖުމްހޫރިއްޔާ ވަނީ ދާދި ފަހުން އިއުލާނު ކުރައްވާފަ އެވެ. އެހެން ކަމުން ރައީސް މި ބިލު ތަސްދީގުކުރައްވާނެ ކަން ވަރަށް ޔަގީނެވެ.
