"ތޫފާން ދީތުވާ" އާ ގުޅިގެން ލަންކާގައި ހާލުގައި ޖެހުނު ދިވެހި ތިން އާއިލާއަކަށް ދިވެހި ސަރުކާރުން އެހީތެރިކަން ފޯރުކޮށްދީފި އެވެ.
ހާލުގައި ޖެހުނު އެ ތިން އާއިލާއަކީ ވެސް ކޮލަމްބޯގައި ދިރިއުޅޭ އާއިލާތަކެކެވެ. ދިވެހި ހައި ކޮމިޝަނުން ބުނީ ލަންކާގައި ހާލުގައި ޖެހުނު ތިން އާއިލާއެއްގެ 12 މެންބަރުންނަށް އެހީތެރިކަން ފޯރުކޮށްދީފައިވާ ކަމަށާއި އެ އާއިލާތައް މިހާރު ވަނީ ކޮލަމްބޯގައި ދިރިއުޅޭ އެ އާއިލާތަކުގެ ރަށްޓެހިންނާއި ތިމާގެ މީހުން ދިރިއުޅޭ ގެތަކަށް ބަދަލުކޮށްފައި ކަމަށެވެ.
އެ އާއިލާތަށް ރައްކާތެރި ހިސާބުތަކަށް ބަދަލުކޮށްފައިވަނީ ލަންކާގެ ފުލުހުންގެ އެހީތެރިކަމާއެކުގައި ކަމަށް ހައި ކޮމިޝަނުން ވަނީ ބުނެފަ އެވެ. އެ އާއިލާތަށް ދިރުއުޅޭ ގެތަކަށް ކޮންމެވެސް ވަރަކަށް ގެއްލުން ލިބިފައިވާ ކަމަށް ވެސް ހައި ކޮމިޝަނުން މައުލޫމާތުދެ އެވެ.
ލަންކާގައި ދިރިއުޅޭ ދިވެހި 1273 ފަރާތަކަށް ގުޅައި ހައި ކޮމިޝަނުން ވަނީ ހާލު ބަލާފަ އެވެ. އޭގެ ތެރެއިން 45 ފަރާތަކަށް އެހީތެރިކަން ބޭނުންވެ އެ ފަރާތްތަކަށް އެހީތެރިކަން ފޯރުކޮށްދީފައިވާ ކަމަށް ކޮމިޝަނުން ބުނެފައިވެ އެވެ.
ލަންކާ އަށް އެރި ތޫފާނު މިހާރު ދަނީ ލަންކާއާ ދުރަށެވެ. ނަމަވެސް ވެރިރަށް ކޮލަމްބޯގައި ދަނީ ފެންބޮޑުވަމުންނެވެ.
ލަންކާއަށް ދިމާވި ކާރިސާއިން އަރައިގަތުމަށްޓަކައި އެ ގައުމަށް އެހީތެރިކަން ފޯރުކޮށްދިނުމުގެ ގޮތުން "ސިލޯނާއެކު ދިވެހިރާއްޖެ" ނަމުގައި ވަނީ ބޮޑު ކެމްޕެއިނެއް ފަށާފަ އެވެ.





