ކުރިއަށް އޮތް ލޯކަލް ކައުންސިލް އިންތިހާބާއި އަންހެނުން ތަރައްގީގެ އިންތިހާބުގެ ޕްރައިމަރީ އަންނަ މަހު ބޭއްވުމަށް ހަމަޖެހިއްޖެ އެވެ.
މިއަދު މެންދުރު ފަހު ޕީއެންސީ އޮފިހުގައި ބޭއްވި ޕްރެސް ކޮންފަރެންސުގައި ވާހަކަފުޅު ދައްކަވަމުން ޕީއެންސީ ޕީޖީ ގްރޫޕުގެ ލީޑަރު އަދި ކުރިއަށް އޮތް އިންތިހާބުގެ ކެމްޕެއިން މެނޭޖަރު އިބްރާހިމް ފަލާހު ވިދާޅުވީ ލޯކަލް ކައުންސިލް އަދި އަންހެނުން ތަރައްގީގެ އިންތިހާބަށް ކުރިމަތިލާ ފަރާތްތަކުގެ އެޕްލިކޭޝަން ފޯމު އެ އޮފީހަށް މާދަމާއިން ފެށިގެން ހުށަހެޅޭނެ ކަމަށެވެ. އަދި ޕާޓީގެ ޕްރައިމަރީ ޑިސެމްބަރު މަހުގެ 27 ވަނަ ދުވަހު ބޭއްވިގެންދާނެ ކަމަށް ފަލާހު ވިދާޅުވި އެވެ. ވޯޓު ލާއިރު ވޯޓު ލާން ޖެހޭނީ އެމީހަކު ރަޖިސްޓަރީ ވެފައިވާ ފޮށްޓަކަށް ކަމަށް ވެސް ފަލާހު ވިދާޅުވި އެވެ. ރަށުގައި ހުންނަ ފޮށްޓަށް ރަޖިސްޓަރީ ވެފައިވާ ފަރާތަކަށް މާލޭގައި ހުންނަ އެ ރަށޫގެ ފޮށްޓަށް ވޯޓު ނުލެވޭނެ ކަމަށް ވެސް އޭނާ ވިދާޅުވި އެވެ.
ފަލާހު ވިދާޅުވީ މިހާރުވެސް ޕްރައިމަރީގައި ވާދަކުރަން ގިނަ އަދަދެއްގެ ބޭފުޅުން ޝައުގުވެރިކަން ފާޅު ކުރައްވާފައިވާ ކަމަށާއި އެހެން ކަމުން މި ޕްރައިމަރީ ވެގެންދާނީ މިހާތަނަށް ރާއްޖޭގައި ބޭއްވޭ އެންމެ ބޮޑު ޕްރައިމަރީ އަށް ކަމަށް އޭނާ ވިދާޅުވި އެވެ. އަދި މިއީ ރާއްޖޭގައި މިވަގުތު އޮތް އެންމެ ބޮޑު ޕާޓީ ކަމަށާއި އެކަން އެންމެ ފަހުން އެ ޕާޓީން ބޭއްވި ބޮޑު ޖަލްސާ އިން ފެންނާނެ ކަމަށް ފަލާހު ވިދާޅުވި އެވެ.
ފަލާހު ވިދާޅުވީ ޕްރައިމަރީއާ ނުލައި އެއްވެސް މީހަކަށް ޕާޓީގެ ފަރާތުން ޓިކެޓު ނުދޭނެ ކަމަށާއި، ޕްރައިމަރީގައި ވާދަކުރަން ޕީއެންސީގެ ހުރިހާ ފަރާތްތަކަށް ވެސް ފުރުސަތު އޮންނާނެ ކަމަށެވެ. އަދި ޕްރައިމަރީގެ ކަންކަން އެ ޕާޓީ އިން ގެންދާނީ ވަރަށް ބޮޑަށް ދެފުއް ފެންނަ ގޮތަކަށް ކަމަށް ވެސް އޭނާ ވިދާޅުވި އެވެ.
ޕްރެސް ގައި ވާހަކަފުޅު ދައްކަވަމުން މިނިސްޓަރު އަމީން ވިދާޅުވީ މިފަހަރު އިންތިހާބަށް 1،400 މީހުން ފޯމު ހުށަހަޅާނެ ކަމަށާއި، ފޯމު ހުށަހަޅަން ޖެހޭނީ ޕޯޓަލް އެއް މެދުވެރިކޮށް ކަމަށެވެ. އަދި ޕޯޓަލްއާ ބެހޭ މައުލޫމާތު ޕާޓީގެ އެކި ގުނަވަންތަކަށް މިރެއިން ފެށިގެން ފޯރުކޮށްދޭނެ ކަމަށެވެ.
ލޯކަލް ކައުންސިލް އިންތިހާބު އަންނަ އަހަރު އޭޕްރީލް މަހު ބާއްވަން އިލެކްޝަންސް ކޮމިޝަނުން ވަނީ މީގެ ކުރިން ނިންމާފަ އެވެ.
