ވެރިކަން ކުރާ ޕާޓީ، ޕީޕަލްސް ނެޝަނަލް ކޮންގްރެސްގެ ނޫސްވެރިންގެ ބައްދަލުވުމެެއް މިއަދު ބާއްވަން ހަމަޖެހިއްޖެ އެވެ.
މިއަދު މެންދުރު ފަހު 13:00 ގައި އޮންނަ މި ބައްދަލުވުން އޮންނާނީ އެ ޕާޓީގެ އޮފީސް ކަމަށްވާ ސީތްރެކް ބިލްޑިންގެ ހަތް ވަނަ ފަންގިފިލާގަ އެވެ.
މިއީ ކޮން ކަމަކާ ގުޅިގެން ބާއްވާ ބައްދަލުވުމެއް ކަމެއް ސާފެއް ނޫނެވެ. ނަމަވެސް ރޭގެ ވަގުތެއްގައި އެ ޕާޓީގެ ޕީޖީ ގްރޫޕުގެ ލީޑަރު އިބްރާޙިމް ފަލާހު ވަނީ ކުރިއަށް އޮތް ލޯކަލް ކައުންސިލް އިންތިހާާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ އިންތިހާބުގެ ކެމްޕެއިން މެނޭޖަރަކަށް ހަމަޖައްސާފަ އެވެ. މި އިންތިހާބުތަކަށް ތައްޔާރުވުމަށް ބާއްވާ ނޫސްވެރިންގެ ބައްދަލުވުމެއް ކަމަށްވުން އެކަށީގެންވެ އެވެ.
ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުޢިއްޒު ވަނީ ރޭގެ ވަގުތެއްގައި ރަސްމީ ދަތުރުފުޅެއްގައި އިނގިރޭސީވިލާތަށް ފުރައިވަޑައިގެންފަ އެވެ. އެމަނިކުފާނު ފުރައިވަޑައިގަތީ ރަސްގެފާނު، ހިޒް މެޖަސްޓީ ކިންގ ޗާލްސް ތިންވަނައިގެ ދައުވަތަކަށް، ސަސްޓެއިނަބަލް މާކެޓްސް އިނީޝިއޭޓިވް (އެސްއެމްއައި) އިން އިންތިޒާމުކޮށްގެން ކުރިއަށްގެންދިއުމަށް ހަމަޖެހިފައިވާ، "ހައި-ލެވެލް ބްރީފިންގ އޮން ޕްރައިވެޓް ކެޕިޓަލް މޮބިލައިޒޭޝަން" ގައި ބައިވެރިވެވަޑައިގަތުމަށެވެ.
