ލަންކާ އަށް ބޮޑެތި ގެއްލުންތަކެއް ކުރިމަތިވި ތޫފާން ދިތުވާ މިއަދު ހެނދުނު ލަންކާ ފަސްދީދިއެވެ. ނަމަވެސް، ލަންކާގެ ބައެއް ސަރަހައްދުތަކަށް ފަރުބަދަތަކުގެ މަތިންނާއި ބަންޑުންވި ކޯރުތަކުން ދަތުރުކުރާ ފެނުގެ ސަބަބުން ނުރައްކާ އެބައޮތެވެ.

މަސްދަރުތައް ބުނާ ގޮތުގައި މި ތޫފާނުގެ ސަބަބުން ކޮލަމްބޯ، އާއި މެދުތެރޭގެ ފަރުބަދަމަތީ ގިނަ ސަރަހައްދުތަކަށް އެންމެ 24 ގަޑިއިރުގެ ތެރޭގައި 300 މިލިމީޓަރަށް ވުރެ ގިނަ ވާރޭ ވެހުނެވެ.

ނަތީޖާއެއްގެ ގޮތުން ބިންގަނޑު ކަނޑައިގެން ދިޔުމާއި ބަމްޑުންވި ކޯރުތަކުގެ ސަބަބުން މަދުވެގެން 153 މީހުން މަރުވެ، ގާތްގަނޑަކަށް 191 މީހުން ވަނީ ގެއްލިފައި ކަމަށް ލަންކާ އިން ބުނެއެވެ. އަދި 500،000 އަށް ވުރެ ގިނަ މީހުންނަށް އަސަރުކޮށް، ގާތްގަނޑަކަށް 78،000 މީހުންގެ ގެދޮރު ވެސް ވަނީ ގެއްލިފައެވެ.

ލަންކާގައި މިވަގުތު 800 ރިލީފް ސެންޓަރު ވަނީ ހަދާފައެވެ. އޭގެތެރޭގައި ގިނައީ ސްކޫލްތަކާއި އާންމު އިމާރާތްތަކެވެ.

މި ތޫފާނުގެ ސަބަބުން އުމްރާމީ ގޮތުން ވަރަށް ބޮޑަށް ގެއްލުން ލިބިފައިވެއެވެ. ގެދޮރު ހަލާކުވެ، ބޮޑެތި އަވަށްތަކުން ކަރަންޓް ކެނޑުމާއި، ކޯރުތަކާއި ރިޒާވަރުތައް ފުރި، އަދި ރޭލް ލައިންތައް ހަލާކުވެ ބިންގަނޑު ވަނީ ކަނޑައިގެން ގޮސް، މަގުތައް ބަންދުވެފައެވެ.

މި ތޫފާން މިއަދު ހެނދުނު ލަންކާ ދޫކޮށްލާފައިވާއިރު އުތުރާއި ހުޅަނގުގެ ސަރަހައްދު އަދި މެދުތެރޭގެ ބައެއް ސަރަހައްދުތަކުގައި ބިންގަނޑު ކަނޑައިގެން ދިއުމުގެ ފުރުސަތު އަދިވެސް އެބައޮތެވެ.