ލަންކާ އަށް ދިމާވެފައިވާ ގުދުރަތީ ކާރިސާއާ ގުޅިގެން އެގައުމަށް ދިވެހިންގެ ފަރާތުން އެހީތެރިކަން ފޯރުކޮށްދިނުމުގެ ގޮތުން "ސިލޯނާއެކު ދިވެހީން"ގެ ނަމުގައި ޓެލެތޯނެއް ފަށައިފި އެވެ.

ދައުލަތުގެ މީޑިއާ "ޕީއެސްއެމް" އިން އިސް ނަގައިގެން ފެށި މި ޓެލެތޯނުގައި ރާއްޖޭގެ ގިނަ އަދަދެއްގެ އެހެން މީޑިއާތައް ވެސް ބައިވެރިވި އެވެ. މިއަދު ހެނދުނު 09:00 ގައި ފެށި މި ޓެލެތޯނު ނިންމާލަން ހަމަޖެހިފައިވަނީ މިރޭ ދަންވަރު 01:00 ގަ އެވެ.

ލަންކާ އަށް އެހީތެރިކަން ފޯރުކޮށްދިނުމުގެ ގޮތުން އެކި ގޮތްގޮތަށް ފައިސާ ހަދިޔާ ކުރެވޭނެ އެވެ. އެގޮތުން ޓްރާންސްފާ މެދުވެރިކޮށް، ކިއުއާރު ކޯޑު ސްކޭން މެދުވެރިކޮށް، ޗެކު އަދި ކޭޝް މެދުވެރިކޮށް ފައިސާ ދެއްކޭނެ އެވެ. ފަންޑު ފޮށިތައް ބެހެއްޓިފައި ހުންނާނީ މާލެ، ހުޅުމާލެ އަދި ވިލިމާލޭގަ އެވެ.

ޓްރާންސްފާ ކުރާނީ ބީއެމްއެލްގައި ހުޅުވާފައިވާ "Ceylon Aaeku Dhiveheen" މި އެކައުންޓަށެވެ.

ދިވެހި ރުފިޔާ އެކައުންޓް ނަންބަރު: :7730000796107

ޔޫއެސް ޑޮލަރު އެކައުންޓް ނަންބަރު: 7730000796106

ލަންކާ އަށް ދިމާވެފައިވާ ހާލަތުން އަރައިގަތުމަށް ދިވެހި ސަރުކާރުން އިއްޔެ ވަނީ އެ ގައުމަށް 50،000 ޔޫއެސް ޑޮލަރާއި 25،000 ކޭސް މަސްދަޅު ހަދިޔާކުރަން ނިންމާފަ އެވެ.

ލަންކާ އަށް ދިމާވެފައިވާ ތޫފާނުގައި މިހާތަނަށް އެ ގައުމުގެ 153 އަށްވުރެ ގިނަ މީހުން މަރުވެފައިވާއިރު އެތައް ސަތޭކަ މީހުން ގެއްލިފައިވެ އެވެ. އަދި އެޔތައް ހާސް މީހުންގެ ގެދޮރު ގެއްލި ވަގުތީ ހިޔާތަކަށް ވަނީ ބަދަލުކޮށްފަ އެވެ. މި ކާރިސާއިން އަރައިގަތުމަށް މިދިޔަ ހުކުރު ދުވަހު ލަންކާގެ ރައީސް ވަނީ ބައިނަލްއަގުވާމީ އެހީތެރިކަމަށް އެދިފަ އެވެ.

ދައުލަތުގެ މީޑިއާ އިން މިފަދަ ޓެލެތޯނެއް ފެށި މައިގަނޑު ސަބަބަކީ ލަންކާ އަކީ ޒަމާނުއްސުރެ ދިވެހީންގެ އެކުވެރިއަކަށް ވާތީ އެވެ. ލަންކާގެ ރައީސް ދާދި ފަހުން ރާއްޖެއަށް ރަސްމީ ދަތުރުފުޅެއް ވެސް ކުރައްވާފައިވެ އެވެ.