ސްރީލަންކާއަށް މިހާރު ކުރަމުންގެންދާ ވިއްސާރާއާ ގުޅިގެން އެ ގައުމުގައި ދިރިއުޅޭ ފަރާތްތަކުގެ ހާލު ބެލުމަށް އުރީދޫ ކަސްޓަމަރުންނަށް ހިލޭ ގުޅޭނެ ގޮތް ހަމަޖައްސައިދީފި އެވެ.
މިކަމާ ގުޅިގެން އުރީދޫއިން ބުނެފައިވާ ގޮތުގައި، ކުރިއަށް އޮތް 24 ގަޑިއިރު، ސްރީލަންކާގެ ނަމްބަރުތަކަށް ކުރާ ކޯލްތަކުގެ ފުރަތަމަ ފަސް މިނަޓަށް އެއްވެސް ޗާޖެއް ނުކުރާނެ ކަމަށާއި، މިއީ އާއިލާ އާއި ރަހުމަތްތެރިންގެ ސަލާމަތާއި ރައްކާތެރިކަން ކަށަވަރު ކުރުމަށް އެހީތެރިވެދިނުމުގެ ގޮތުން ދޭ ފުރުސަތެއް ކަމަށެވެ.
ސްރީލަންކާ އަކީ ގިނަ އަދަދެއްގެ ދިވެހިން ދިރިއުޅޭ ގައުމެއް ކަމުން، އެ ގައުމުގައި ދިރިއުޅޭ ފަރާތްތަކަށް ފަސޭހައިން ގުޅޭނެ ގޮތް ހަމަޖައްސައިދިނުމަކީ މުހިންމު ކަމެއްގެ ގޮތުގައި ދެކޭ ކަމަށް އުރީދޫއިން ވަނީ ބުނެފަ އެވެ.
މީގެ އިތުރުން އުރީދޫގެ އަމާޒަކީ މިފަދަ ހިތާމަވެރި އަދި ދަތި އުނދަގޫ ދަނޑިވަޅުތަކުގައި މުޖުތަމައަށް އެހީތެރިކަން ފޯރުކޮށްދިނުން ކަމަށް އުރީދޫއިން ވަނީ ބުނެފަ އެވެ.
