ގައުމެއްގައި ފާހިޝް ކަންތައްތައް ފެތުރި އާންމުވުމަކީ އެތަނަކަށް މާތްﷲގެ ކޯފާ އަންނާނެ ސަބަބެއް ކަމަށް މިއަދުގެ ހުކުރު ހުތުބާގައި ބުނެފި އެވެ.
މިއަދުގެ ހުކުރު ހުތުބާގައި ބުނެފައިވާ ގޮތުގައި، ބައެއްގެ ތެރޭގައި ފާހިޝް ކަންތައް ފެތުރި ފާޅުވެ، އެ ބަޔަކު އެކަން އާންމުކޮށްފިނަމަ އިސްވެދިޔަ އެ މީހުންގެ ކާބަފައިންގެ މެދުގައި ފެތުރިފައިނުވާ ޠާޢޫނު ބައްޔާއި ކެކުޅުންތައް އެބައިމީހުންގެ ތެރޭގައި ފެތުރިގެންދާނެ ކަމަށެވެ. އަދި މިފަދަ ވަބާތައް ފެތުރެނީ އެބައިމީހުންގެ ފާހިޝް އަމަލުތަކުގެ ރަހަ އެބައިމީހުންނަށް ދެއްކެވުމަށްޓަކައި ކަމަށް މިއަދުގެ ހުކުރު ހުތުބާގައި ވަނީ ބުނެފަ އެވެ.
ފާހިޝް ކަންތައްތަކާ ދުރުހެލިވުމަށް މާތްﷲ އިންސާނުންނަށް އަމުރުކުރައްވާފައިވާ ކަމަށާއި، އިސްލާމްދީން ވަނީ އަފުރާދުންނާއި މުޖުތަމައު ފާހިޝް ކަންތަކާ ދުރުހެލިކުރުމަށް ހުރިހާ ގޮތަކުންވެސް ބާރު އަޅުއްވާފައިވާކަމަށް ހުތުބާގައި ވަނީ ބުނެފަ އެވެ.
މިއަދުގެ ހުތުބާގައި ބުނެފައިވާ ގޮތުގައި، ފާހިޝްކަންތަކާއި ދުރުހެލިވުމުގެ އިތުރުން އެފަދަ ކަންތައް ފެތުރުމާއި އެފަދަ ކަންކަމަށް މަގުފަހިކޮށްދޭ ހުރިހާ ކަމެއް އިސްލާމްދީނުގައި ހަރާމްކުރައްވާފައިވާ ކަމަށެވެ. މީގެ އިތުރުން ޒިނޭގެ ފާހިޝް ކަންތައްތައް ހަރާމް ކަމުގެ ވާހަކަ ބަޔާންކުރެއްވުމުގެ ކުރީގައި އެކަމަށް މަގުފަހިކޮށްދޭ ހަރާމް ބެލުންތަކުން ދުރުހެލިވުމަށް އަމުރުކުރައްވާފައިވާ ކަމަށް ހުތުބާގައި ވަނީ ފާހަގަ ކޮށްފަ އެވެ.
ފާހިޝް ކަންތައްތަކާ ދުރުހެލިވުމުގެ އިތުރަށް އެފަދަ ކަންތައްތަކަށް އަރައި ނުގަތް ކަމުގައިވީ ނަމަވެސް، ފާހިޝް ކަންތައްތައް ފެތުރުމަށް ލޯބިކުރާ މީހުންނަށް ދުނިޔޭއާއި އާހިރަުގައި ގަދަފަދަ ވެގެންވާ އަޒާބު ހުރިކަމަށް ހުތުބާގައި ވަނީ ބުނެފަ އެވެ.
މިއަދުގެ މުޖުތަމައުތަކުގައި ފާހިޝް ކަންތައްތައް ފެތުރުމުގެ އެންމެ ބޮޑު ދައުރެއް އަދާކުރަނީ މީސްމީޑިއާގެ ވަސީލަތްތައް ކަމަށް ވާއިރު، މިފަދަ ކަންކަންކުރާ ފަރާތްތަކުން މިފަދަ ކަންކަންކުރަނީ، ކުޑަކުދިންނާއި ޒުވާނުންނާއި އެންމެހައި އަފުރާދުންނަށް އެކަމުން ލިބިދާނެ ގެއްލުމާއި ހަލާކަށް ވިސްނާ ނުލައި ކަމަށް ހުތުބާގައި ވަނީ ބުނެފަ އެވެ. އަދި އެ ފަދަ މީހުންގެ އަމަލުތަކާމެދު ގިޔާމަތް ދުވަހު ސުވާލުކުރެއްވޭނެ ކަމަށް ހުތުބާގައި ބުންޏެވެ.
މާތްﷲ އަށް ތަގުވާވެރިވެ، މާތްﷲ ނަހީކުރެއްވި ކަންކަމުން ދުރުހެލިވެ، ފާހިޝް އަމަލުތަކާ ދުރުހެލިވުމަށް މިއަދުގެ ހުކުރު ހުތުބާގައި ވަނީ ނަސޭހަތްތެރިވެފަ އެވެ.
