މި ސަރުކާރުން ދިވެހިންގެ ވިޔަފާރިތައް ބާރުވެރި ކުރުވައި، ދިވެހިންގެ ތިޔާގިކަމަށް އިސްކަން ދޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
މިނިސްޓަރު ސައީދު މި މޭރުމުން ވިދާޅުވީ އެކްސްގައި ހިއްސާކުރެއްވި ޕޯސްޓެއްގަ އެވެ. މިނިސްޓަރު ވިދާޅުވި ގޮތުގައި، ގަވާއިދާ ހިލާފަށް ބިދޭސީން ހިންގާ ވިޔަފާރިތައް ދެނެގަނެ، އަވަސް ފިޔަވަޅުތަކެއް އެޅުމަށް ސަރުކާރުން ނިންމަވާ، މިފަދަ ވިޔަފާރި ރިޕޯޓްކުރެވޭނެ އިންތިޒާމް ހަމަޖެހިގެން ދިއުމަކީ، ރައްޔިތުން ނުހަނު ކަންބޮޑުވާ މި ޒަމާންވީ މައްސަލައަށް ދާއިމީ ހައްލެއް ހޯދުމަށް މި ސަރުކާރުން ފަށާފައިވާ މަސައްކަތަށް ލިބުނު އިތުރު ބާރެއް ކަމަށް ވަނީ ވިދާޅުވެފަ އެވެ.
Advertisement
1979 ވަނަ އަހަރު ހެދިފައި އޮތް ފޮރިން އިންވެސްޓްމަންޓް ގާނޫނު، 46 އަހަރަށް ފަހު ނިމުމަކަށް ގެނެސް، މިޒަމާނަށް ފެތޭ، އަދި މާޒީގައި ކުރެވިފައިވާ އެކި ތަޖުރިބާތަކުގެ އަލީގައި އޭރުއްސުރެ ކުރިމަތިވަމުން އައި މައްސަލަތައް ހައްލު ކުރެވޭނެ ހަރުދަނާ ގާނޫނެއް މުޅިން އަލަށް އެކުލަވާލައި، ފާސްކޮށް، ގެޒެޓުކުރެވި އަމަލުކުރަން ފެށިފައިވުމަކީ، ބިދޭސީން ނުގަވާއިދުން ރާއްޖޭގައި ހިންގާ ވިޔަފާރިތައް ހުއްޓުވައި، ފުރިހަމަ ބާރުވެރިކަމާއެކު ފިޔަވަޅުތައް ތަންފީޒު ކުރުމަށް މި ސަރުކާރުން ފަހިކުރި ފުރުސަތެއް. --- މިނިސްޓަރު ސައީދު އެކްސްގައި ހިއްސާކުރެއްވި ޕޯސްޓުގައި ވިދާޅުވި އެވެ.
މިކަމުގައި ތަންފީޒީ އިދާރާތަކާއި، ހޯމް މިނިސްޓްރީއާއި އިކޮނޮމިކް މިނިސްޓްރީ ގުޅިގެން ހާއްސަ މަސައްކަތްތަކެއް ކުރުމަށް ރޭވިފައިވާ ކަމަށް މިނިސްޓަރު ވިދާޅުވި އެވެ.
މިފަދަ ކޮންމެ މައްސަލައެއްވެސް ހައްލުކުރެވޭނީ ސަރުކާރާއި ރައްޔިތުން ގުޅިގެން ކަމަށާއި، ނުގަވާއިދުން ވިޔަފާރިކުރާ އެއްވެސް ފަރާތަކަށް ފުރުސަތު ނުދީ އަދި ދިވެއްސެއްގެ ނިވަލުގައި ފިލައި ހުރެ އަމިއްލަ ވިޔަފާރިތައް ހިންގާ ބިދޭސީންނަށް ޖާގަ ނުދިނުމަށް އެންމެން އެއްރޫހެއްގައި އެއްބާރުލައިގެން ކަމަށް މިނިސްޓަރު ސައީދު ވިދާޅުވިއެވެ.
