ޑޮކްޓަރުން ބޭސް ސިޓީގައި ލިޔުއްވާ ބައެއް ބްރޭންޑެޑް ބޭސްތައް ނުލިބުމުގެ ޝަކުވާ ލިބޭ ކަމަށާއި ނަމަވެސް ޖެނެރިކް ނަމުން އެ ބޭސްތައް ލިބޭނެ ކަމަށް ހެލްތް މިނިސްޓަރު އަބްދުﷲ ނާޒިމް ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ މަޖިލީހަށް ހާޒިރުކޮށް މެންބަރަކު ކުރެއްވި ސުވާލަށް ޖަވާބު ދެއްވަމުންނެވެ.
ކުރިން އާސަންދައިން ލިބޭ ބޭސްތައް މިހާރު ނުލިބޭކަމަށާއި އެއީ ކީއްވެގެންތޯ ގަލޮޅު އުތުރު ދާއިރާގެ މެންބަރު މީކާއިލް ނަސީމް ކުރެއްވި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ ވަކި ސްޕެސިފިކް ބްރޭންޑެއް ބޭނުންވެގެން އުޅޭއިރު އެ ބްރޭންޑެއް ރާއްޖެއިން ނުލިބިދާނެ ކަމަށާއި، ނަމަވެސް އެ ބޭސް ލިބޭނެ ކަމަށެވެ.
"ބައެއް ހާލަތްތަކުގައި އާދޭ އަޅުގަނޑުމެންނަށް ބައެއް ބޭސްތައް އަދި ހާއްސަކޮށް ބައެއް ހާލަތްތައް ދިމާވަނީ ވަކި ސްޕެސިފިކް ބްރޭންޑެއް ބޭނުންވެގެން އުޅޭއިރު އެ ބްރޭންޑެއް ނުލިބުން. ބޭސްތައް މި ހުންނަނީ ޖެނެރިކް އެންޑް ބްރޭންޑްސް. އެހެންކަމުން ޑޮކްޓަރުން ބައެއް ފަހަރު ވަކި ސްޕެސިފިކް ބްރޭންޑެއް ލިޔުއްވައިފިކަމަށް ވާނަމަ ދިވެހި މުޖުތަމައުގައި އެ ބްރޭންޑެއް ނުލިބުމުގެ ހާލަތްތައް ބައެއް ދަނޑިވަޅުގައި އާދޭ އެހެން ނަމަވެސް މިކަން ހައްލުކުރުމަށްޓަކައި ވެސް އަޅުގަނޑުމެން ކުރަންޖެހޭ ކަންކަން ކުރެވި އަޅަންޖެހޭ ފިޔަވަޅުތައް އެޅެމުންދާ ވާހަކަ ދަންނަވަން." ނާޒިމް ވިދާޅުވި އެވެ.
މިނިސްޓަރު ވިދާޅުވީ މި މައްސަލަ ހައްލުކުރެވި އަރައިގަނެވޭނެ ކަމަށާއި ދިވެހި ރާއްޖޭގައި ގާއިމްކުރަން އޮންނަނީ ބޭހުގެ ބައިގަނޑު ދެ ލިސްޓެއް ކަމަށާއި، އެއީ އެސެންޝަލް މެޑިސިން ލިސްޓާއި އެޕްރޫވްޑް ޑުރަގް ލިސްޓް ކަމަށެވެ. އަދި މި ދެ ލިސްޓުގައި ހުންނަންޖެހޭ ހުރިހާ ބޭހެއް ނިޒާމުގެ ތެރެއިން ކަށަވަރުކުރެވޭނެ ގޮތެއް ގާއިމްކުރުމުގެ މަސައްކަތް އެބަ ކުރެވޭ ކަމަށާއި އެ މަސައްކަތް ނިމުމުން ކަންބޮޑުވުންތަކަށް ހައްލު އަންނާނެ ކަމަށެވެ.
އެސްޓީއޯ މެދުވެރިކޮށް ރަނގަޅު ފެންވަރުގެ ބޭސް ރާއްޖެ އެތެރެކުރުމަކީ މި ސަރުކާރު ވަރަށް އިސްކަންދީގެން ކުރާ ކަމެކެވެ. އާސަންދައިން ބައެއް ބޭސްތައް ނުލިބުމުގެ ޝަކުވާ އަށް ރިޔާއަތްކޮށް ރައީސް މީގެ ކުރިން ވިދާޅުވެފައިވަނީ ބޭހުގެ އަގު އެސްޓީއޯ އިން ދަށްކުރުމުގެ ސަބަބުން ބައެއް އަމިއްލަ ވިޔަފާރިތަކުން ބޭސް ތާށިކޮށްފައިވާ ކަމަށެވެ. އެހެންކަމުން އެ މައްސަލަ ހައްލުކުރުމުގެ ގޮތުން ފިނޭންސް މިނިސްޓްރީގެ އެހީތެރިކަމާއެކު އެސްޓީއޯ އިން އަންނަނީ ރާއްޖެއަށް ބޭނުންވާ ހުރިހާ ބޭހެއް އެތެރެކުރުމުގެ މަސައްކަތް ކުރަމުން ކަމަށެވެ.
މީގެ ކުރިން އަމިއްލަ ގިނަ ވިޔަފާރިތަކުން ބޭސް ވިއްކަމުން އައީ 1،000 ޕަސެންޓާއި 2،000 ޕަސެންޓުގެ ފައިދާއެއް ލައިގެންނެވެ.
