މާލެ ސިޓީ މޭޔަރު ކަމުގައި ރައީސް ޑރ. މުޙައްމަދު ހުންނެވި ދުވަސްވަރު ކައުންސިލުން ފާސް ނުކޮށް އެއްވެސް ބިމެއް އަދި ޕްރޮޖްކްޓެއް ވެސް އެއްވެސް ފަރާތަކަށް ދީފައި ނުވާނެ ކަމަށް މާލެ ސިޓީގެ ޑެޕިއުޓީ މޭޔަރު މުހައްމަދު އަރީޝް ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި އަރީޝް ވިދާޅުވީ މާލެ ސީޓީގެ ހަތަރުވަނަ ދައުރުގެ ރައީސް ކަމުގައި ރައީސް މުޢިއްޒު ހުންނެވި އިރު ކޮންމެ ކަމެއްވެސް ކުރަމުން ދިޔައީ ޑޮކިއުމަންޓް ހެދި ކައުންސިލަރުންނާއި މަޝްވަރާ ކުރެވި އަދި ކައުންސިލް ފުލޯ އިން ވެސް ފާސް ކޮށްގެން ކަމަށެވެ.
މިފަދަ ޕޯސްޓެއް ޑެޕިއުޓީ މޭޔަރު ކުރަން ޖެހުނު ސަބަބަކީ މާލެ ސިޓީގެ ގަލޮޅު އުތުރު ދާއިރާގެ މެންބަރު މުހައްމަދު ސައިފް ފާތިހު ކުރެއްވި އެކްސް އަކާއި ގުޅިގެންނެވެ. ސައިފް ވިދާޅުވީ ރައީސް މުޢިއްޒު މޭޔަރު ކަމުގައި ހުންނެވި އިރު އިއުލާނު ކުރުމެއް ނެތި މާލެ އާއި ވިލިމާލެއިން އަމިއްލަ ފަރާތްތަކާއި ރާއްޖޭން ބޭރުގެ ބައެއް ފަރާތްތަކަށް ބިންތައް ދޫކޮށްލީ ކައުންސިލުން ފާސް ނުކޮށް ކަމަށެވެ.
ނަމަވެސް، ސައިފް ފާތިހު އެ ވިދާޅުވީ ތެދެއް ނޫން ކަން ފާހަގަ ކުރައްވައި ޑެޕިއުޓީ މޭޔަރު އަރީޝް ވިދާޅުވީ ބިންތައް ދޫކޮށްފައިވާ ހުރިހާ ޑޮކިއުމަންޓެއް ކައުންސިލްގައި ހުންނާނެ ކަމަށާއި ހުރިހާ ބިންތަކުގެ އެގްރީމަންޓު ތަކާއި ޔަޥްމިއްޔާ ވެސް ހުންނާނެ ކަމަށެވެ. އަދި މި ފަހުން ނެތޭ ބުނި ބައެއް ޑޮކިއުމަންޓު ކައުންސިލް ތެރެއިން ލީކު ކޮށްލި މަންޒަރު ވެސް ފެނިގެން ގޮސްފައިވާ ކަމަށް ވެސް އަރީޝް ވިދާޅުވި އެވެ.
އިދިކޮޅު ފަރާތްތަކުން މިފަދަ ދޮގު ޚަބަރު ފަތުރާތީވެ، މި މައްސަލަ އާއި ގުޅިގެން ކުރީގެ ޑެޕިއުޓީ މޭޔަރު އަޙްމަދު ނަރީޝް ވެސް ވަނީ ރައްދެއް ދެއްވާފައެވެ. ނަރީޝް ވިދާޅުވީ އިދިކޮޅުން މިފަދަ ވާހަކަތައް ފަތުރަނީ ކުރިޔަށް އޮތް ކައުންސިލް އިންތިޚާބު ކާމިޔާބު ކުރެވޭނެ ގޮތެއް ނެތުމުންނެވެ. އަދި ހަމަޖެހޭ ވާހަކަތައް ދެއްކުމަށް ވެސް ނަރީޝް ވިދާޅުވިއެވެ.
“ރައީސް މުއިއްޒު މާލެސިޓީގެ މޭޔަރަކަށް ހުންނެވި ދުވަސްވަރު ކައުންސިލާއި މަޝްވަރާ ނުކޮށް އެއްވެސް ނިންމުމެއް ނިންމާފައި ނުވާނެ އަދި މާލެ/ވިލިމާލޭ އެއްވެސް ބިމެއް ކައުންސިލުން ފާސް ނުކޮށް އުސޫލުން ބޭރުން ދޫކޮށްފައި ނުވާނެ! ކުރިޔަށް އޮތް ލޯކަލް ކައުންސިލް އިންތިހާބު ކާމިޔާބު ވާނޭ ހަމަ އެއްވެސް ގޮތެއް ނެތީމާ ނިކުމެ ކޮސް ގޮވަން ފެއްޓީމައި ކަމަކު ނުދާނެ! ނިކަން ހަމަޖެހޭ ވާހަކަ ދައްކަމާ ހިނގާ!!” އަރީޝް ވިދާޅުވިއެވެ.
