ރާއްޖޭގައި ބޮޑެތި ބިން ހިއްކުމުގެ މަޝްރޫއުތައް އަވަސް ކުރުމުގެ ގޮތުން ސަރުކާރުން ފަށާފައިވާ މަސައްކަތުގެ ތެރެއިން ނެދަލެންޑްސްގެ "ޓީއެސްއެޗްޑީ ޕްރިންސް އޮފް ދަ ނެދަލެންޑްސް" މިއަދު ރާއްޖެ އަތުވެއްޖެ އެވެ.
ފޮޓޯ ހިއްސާކުރައްވާ ރައީސުލްޖުމްހޫރިއްޔާ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ މި ޑްރެޖަރު މިއަދު ރާއްޖެ އައިސްފައިވާ ކަމަށާއި މި ޑްރެޖަރު އެންމެ ފުރަތަމަ މަސައްކަތް ފަށާނީ މިހާރު އޮތް ޑްރެޖަރު ކަމަށްވާ "ޓީއެސްއެޗްޑީ އޮރާންޖީ" އާއެކު ހުޅުމާލެ ފޭސް 3 ހިއްކުން ކަމަށެވެ. ރައީސް ވިދާޅުވީ އީއޭއައިއީ އާއި އަދި ފުރިހަމަ ކުރަންޖެހޭ އެހެން ކަންކަން ނިމުމުން ގިރާވަރު ފަޅުގެ ބަންޑް ވޯލްތައް ޖެހުމުގެ މަސައްކަތް ވެސް މި ޑްރެޖަރުން ކުރާނެ ކަމަށެވެ. އަދި އޭގެ އިތުރުން ހުޅުމާލެ ފޭސް 3 ގެ ބައި ހިއްކައި ނިމުމުން ގިރާވަރު ފަޅު ހިއްކުމުގެ މަސައްކަތް ފަށާނެ ކަމަށެވެ.
ރައީސް ވިދާޅުވީ މި ފެށޭ ޑިސެމްބަރު މަސް ނިމުމުގެ ކުރިން ފޭސް 3 ހިއްކައި ނިމޭނެ ކަމަށާއި އެއަށްފަހު ދެތިން މަސްތެރޭ ގިރާވަރު ފަޅުވެސް ހިއްކައި ނިމޭނެ ކަމަށެވެ.
ޖުމްހޫރީ ދުވަހުގެ ހާއްސަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ކުރިއަށް އޮތް މަދު ދުވަސްކޮޅެއް ތެރޭގައި 7،000 އަށްވުރެ ގިނަ ހައުސިން ޔުނިޓުގެ މަސައްކަތް ފެށޭނެ ކަމަށާއި، ކުރިއަށް އޮތް ފަސް މަސްތެރޭ ރަސްމާލެ އިން 15،000 ގޯއްޗަށް އެދި ހުށަހެޅުމަށް އިއުލާން ކުރައްވާނެ ކަމަށެވެ.
އެ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ އަންނަ މަހު ރަސްމާލެ ހިއްކުމުގެ ދުވެލި ތިން ގުނަ ބާރުވާނެ ކަމަށާއި އެގޮތުން އެ ފަޅު ހިއްކުމަށްޓަކައި އިތުރު ޑްރެޖަރުތަކެއް އަންނަ މަހު ރާއްޖެ ބަނދަރު ކުރާނެ ކަމަށެވެ. ރައީސް ވިދާޅުވީ މި ޑްރެޖަރުތައް ގެނައުމަށްޓަކައި އެގްރީމަންޓުތައް ހަދައި ފައިސާ ވެސް ދައްކާފައިވާ ކަމަށެވެ.
މެދުކެނޑުމަކަށްފަހު ހުޅުމާލެ ފޭސް 3 ގައި ހިއްކަމުންދާ ބައި އަލުން ފަށާފައިވަނީ މި މަހުގެ 10 ވަނަ ދުވަހުގަ އެވެ. ރައީސް ވިދާޅުވީ ކުރީ ސަރުކާރުން ގޯތިތައް ދީފައި ހުރީ ކަނޑުން ކަމަށާއި ގޯތިތައް ދެވޭނީ ބިން ހިއްކައިގެން ކަމަށެވެ. ފޭސް 3 ހިއްކަނީ ގޯތިތައް ދިނުމަށެވެ. ގިރާވަރު ފަޅުގެ ބާކީ އޮތް ބައި ހިއްކުމަށްޓަކައި ބަޔަކާއެކު އެގްރީމަންޓު ހަދާފައިވަނީ ވެސް ނޮވެމްބަރު މަހު 10 ވަނަ ދުވަހުގަ އެވެ. 160 ހެކްޓަރުގެ ބިން ހިއްކަން ހަވާލުކުރީ ފަންޑް މެނޭޖްމަންޓް ކޯޕަރެޝަނާ އެވެ. އަދި ފޭސް 3 ގެ 63 ހެކްޓަރުގެ ބިން ހިއްކުމުގެ މަސައްކަތް ކުރަނީ އެޗްޑީސީ އިންނެވެ.
