މާބޮޑު މަސައްކަތްތަކެއް ނުކޮށް ބޭކާރު ގޮތެއްގައި ދައުލަތުގެ ފައިސާ ޚަރަދުކުރުން ހުއްޓުވުމަށްޓަކައި އަތޮޅު ކައުންސިލްތައް އުވާލުމަށް ގާނޫނު އަސާސީއަށް ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފި އެވެ.

މިއަދުގެ ރައްޔިތުންގެ މަޖިލީހުގެ ޖަލްސާގައި މި އިސްލާހު ފާސްކުރުމާމެދު މެމްބަރުންގެ މެދުގައި ވޯޓު ނަގާފައިވާއިރު، އަތޮޅު ކައުންސިލްތައް އުވާލަން ފެންނަ ކަމަށް 75 މެމްބަރުން ވަނީ ވޯޓު ދީފަ އެވެ. އަތޮޅު ކައުންސިލްތައް އުވާލަން ނުފެންނަ ކަމަށް ވޯޓު ދީފައިވަނީ އެންމެ 12 މެމްބަރުންނެވެ.

ސަރުކާރުގެ ފަރާތުން މި އިސްލާހު މަޖިލީހަށް ހުށަހެޅުއްވީ ބާރަށު ދާއިރާގެ މެމްބަރު އިބްރާހިމް ޝުޖާއު އެވެ.

އެހެން ކަމުން މި ގާނޫނު އިސްލާހުވެއްޖެނަމަ ދެން ކުރިއަށް އަންނަން އޮތް ލޯކަލް ކައުންސިލް އިންތިހާބުގައި ހަމައެކަނި އިންތިހާބު ކުރެވޭނީ ސިޓީ ކައުންސިލަރުންނާއި ރަށު ކައުންސިލަރުން އެކަންޏެވެ. މީގެ އިތުރުން އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށްވެސް "އަތޮޅު ކައުންސިލް"، މި ލަފުޒު އުނިކުރުމަށާއި، މުޅި އަތޮޅު ކައުންސިލުގެ ބާބު އުނިކުރުމަށް ހުށަހަޅާފައިވެ އެވެ.

މި އިސްލާހުގައިވާ ގޮތުން، ރަށު ކައުންސިލްތަކުން އަތޮޅު ކައުންސިލުތަކަށް ރިޕޯޓު ކުރުމުގެ ބަދަލުގައި ލޯކަލް ގަވަމެންޓް އޮތޯރިޓީ (އެލްޖީއޭ)އަށް ރިޕޯޓުކުރަން ޖެހޭ ގޮތް ހެދުމަށާއި، 2،000 މީހުންނަށްވުރެ އާބާދީ މަދު ރަށްރަށުގެ ކައުންސިލަރުންގެ އަދަދު ފަހަކުން ތިނަކަށް މަދުކުރުން ވެސް ހިމެނެ އެވެ.

ފާހަގަކޮށްލެވޭ ގޮތުގައި، މި ބިލު ދިރާސާ ކުރުމުގެ މަސައްކަތް ކޮމިޓީން އިއްޔެ ކުރިއަށް ގެންގޮސްފައިވާއިރު، ކޮމިޓީންވެސް ފާސްކޮށްފައި ވަނީ އަތޮޅު ކައުންސިލްތައް އުވާލަން ފެންނަ ކަމަށެވެ.