ސްޓެލްކޯއިން އަންހެނުންނަށް ޚާއްސަކޮށްގެން ހިންގި އިލެކްޓްރިކް ކޯހަކީ މުޖުތަމައަށް މުހިންމު ހެޔޮ ބަދަލުތަކެއް ގެނުވައިދޭނެ ފެށުމެއް ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ސިފަކުރައްވައިފިއެވެ.
"ބިގިނަރސް އިލެކްޓްރިކް ކޯސް ފޯރ ވިމެން" ނަމުގައި ހިންގި މި ތަމްރީން ޕްރޮގްރާމް ފުރިހަމަކުރި ފަރާތްތަކަށް ސެޓްފިކެޓް ހަވާލުކުރުމަށް ބޭއްވުނު ރަސްމިއްޔާތުގައި ޝަރަފްވެރި މެހެމާނުގެ ހައިސިއްޔަތުން ވާހަކަފުޅުދައްކަވަމުން އެކަމަނާ ވިދާޅުވީ ކަރަންޓުގެ މަސައްކަތްތަކަކީ އާންމުކޮށް ރާއްޖޭގައި އަންހެނުން ކުރާ މަސައްކަތެއް ނޫން ނަމަވެސް މިފަދަ ކޯސްތަކުގެ ސަބަބުން މި ދާއިރާއަށް އަންހެނުން ވަނުމަށް މަގުފަހިވެ، އެތައް ބޭނުންތެރި ހުނަރުތަކެއް އުނގެނުމުގެ ފުރުސަތު ލިބިގެންދާނެ ކަމަށެވެ.
ކަރަންޓާ ބެހޭ އަސާސީ މައުލޫމާތު ނެތުމުގެ ސަބަބުން ކަރަންޓް ޝޯޓޭޖާއި އަލިފާނުގެ ހާދިސާތަކާއި، ބައެއް ފަހަރު ފުރާނައަށް ގެއްލުންވާ ފަދަ ކަންކަން ހިނގާކަން ފާހަގަކުރައްވައި، މި ކޯހުގެ ސަބަބުން މިފަދަ ހާދިސާތައް ކުޑަކުރުމަށް އެހީތެރިވެދޭނެކަމަށް އެކަމަނާ ވިދާޅުވިއެވެ.
މީގެ އިތުރުން ކަރަންޓުގެ ޚަރަދު ކުޑަކުރުމަށްޓަކައި އަޅަންޖެހޭ ފިޔަވަޅުތަކުގެ މައުލޫމާތު ކޮންމެ ގެއަކަށްވެސް ވަރަށް މުހިއްމުކަން މެޑަމް ސާޖިދާ ފާހަގަކުރެއްވިއެވެ. މިފަދަ ހޭލުންތެރިކަން ގެތަކުގައި ގާއިމްވުމަކީ ދިރިއުޅުމުގެ ޚަރަދުތައް ކުޑަކުރުމަށް އެޅޭނެ މުހިންމު ފިޔަވަޅެއް ކަމުގައި އެކަމަނާ ވިދާޅުވިއެވެ.
އަންހެނުންނަށް މިފަދަ އިލްމާއި ހުނަރު ލިބުމަކީ އެތައް ގޮތަކުން މުޖުތަމަޢަށް ފައިދާކުރަނިވި ކަމެއްކަން ފާހަގަކުރައްވަމުން އެކަމަނާ ވިދާޅުވީ، މަންމަ ކަރަންޓްގެ މަސައްކަތް ކުރާތަން ފެނުމުން ދަރިންގެ ހިތުގައި މި ދާއިރާއަށް ޝައުގުވެރިކަން އުފެދި، ކުރިމަގުގައި މުޖުތަމަޢަށް ބޭނުންތެރި މަސައްކަތްތެރިންތަކެއް ބިނާވުމަށް މަގުފަހިވެގެންދާނެ ކަމަށެވެ. އަދި މިފަދަ މަސައްކަތްތައް ދަސްވުމުގެ ސަބަބުން ތަކެތި ގަތުމުގައިވެސް ރަނގަޅު ފެންވަރުގެ ތަކެތި ދެނެގަނެ، ގިނަ ދުވަހަށް ދެމިހުންނާނެ ގޮތަކަށް މަސައްކަތްތައް ރާވާ، ޚަރަދުކުޑަކުރެވޭނެ ކަމަށެވެ.
