ތައިލެންޑުގެ ބެންކޮކުގައި މިފަހަރު އޮތް މިސް ޔުނިވާސް ފެސްޓިވަލްގައި މިސްޔުނިވާސް އޮގަނައިޒޭޝަން (އެމްޔޫއޯ) އިން މަކަރު ހަދައިފި ކަމަށް، މި މުބާރާތުގައި މުޅިން އަލަށް ވާދަކުރި ފަލަސްޠީނުގެ ފަތްމިނި ނާދީން އައްޔޫބްގެ އިތުރުން، ފަނޑިޔާރަކު ވެސް ބުނެފިއެވެ.
މިފަހަރުގެ މިސް ޔުނިވާސް އެވޯޑު ލިބުނީ މިސްޔުނިވާސް އޮގަނައިޒޭޝަންގެ ރައީސް އަދި ކޯ-އޯނަރު ރޯޗާގެ ޤައުމު ކަމަށްވާ މެކްސިކޯގެ އަންހެނަކަށެވެ.
މިފަހަރުގެ އިވެންޓުގައި ފަލަސްޠީނުގެ ނާދީން އައްޔޫބަށް ގިނަބައެއްގެ ތާއީދު ލިބުނުއިރު، މުޅި ސޯޝަލްމީޑިއާގައި ވެސް ވައިހިފާފައި ވަނީ ނާދީން ކަމަށް ވާތީވެ ގިނަ ބަޔަކު އުއްމީދުކުރީ އެއްވަނަ ލިބޭނީ ނާދީން އަށެވެ. ނަމަވެސް، މިސް ޔުނިވާސް އޮގަނައިޒޭޝަނުން އެ ޖަމިއްޔާގެ ރަސްމީ އެޕްގައި ފޭނުން ވޯޓުލީއިރު، ވޯޓުގެ ނަތީޖާ ސިއްރުކޮށް، އެޕް ވެސް ވަނީ ކުއްލިޔަކަށް ބަންދު ކޮށްފައެވެ.
މިކަމާއި ގުޅިގެން ފަލަސްޠީނުގެ ނާދީން ބުނީ އޭނާގެ އަތުގައި ސްކްރީންޝޮޓްތައް އެބަހުރި ކަމަށާއި އޭނާ އުޅެނީ ވަރަށް ބޮޑު ތަފާތަކުން ކުރީގައި ނަމަވެސް، ކުއްލިޔަކަށް އެޕް ބަންދުކޮށްފައި، ނަތީޖާ އޮޅުވައިލި މައްސަލައިގައި އެމްޔޫއޯގެ އިތުބާރު ގެއްލިފައިވާ ކަމަށެވެ. އަދި އޭނާ އަށް އެއްވަނަ ނުދިނުމުގައި އުޅެނީ ސިޔާސީ ސަބަބެއް ކަމަށް ވެސް ނާދީން ތުހުމަތު ކުރިއެވެ.
މި ފަހަރުގެ މިސް ޔުނިވާސް މެކްސިކޯގެ ފާތިމާ އަށް ދިނުމަށް މިސް ޔުނިވާސް އޮގަނައިޒޭޝަންގެ ރައީސް ރޮޗާ ވަނީ ޕެނަލް ބޯޑުގައި ހިމެނޭ ލުބުނާނު-ފްރެންޗު ފަނޑިޔާރަކަށް ޕްރެޝަރު ވެސް ކޮށްފައެވެ. އެ މައްސަލައިގައި އެ ފަނޑިޔާރު ވަނީ ޕެނަލް ބޯޑުން އިސްތިއުފާ ދީފައެވެ. ފަނޑިޔާރު ބުނީ ފާތިމާ އަށް ވޯޓު ދިނުމަށް ރައީސް ޕްރެޝަރުކުރީ ފާތިމާގެ ބައްޕަ އަކީ ރައީސްގެ ބިޒްނަސް ޕާޓްނަރަށް ވާތީއެވެ.






